納米樓洗衣店

　　分析師F話搬屋難，主要係因為樓價高昂之外，不同區域之樓價差價實在太大，譬如話由屯門搬往太古城，唔通要由千三呎搬去幾百呎咩，此外，各種交易費用，主要係印花稅，亦令人望而生畏。香港的交通工具點解咁擠逼，理由之一就係跨區返工嘅人太多，現在新界已經係人口最多地區，但白領工作就集中於港島及九龍東及尖沙嘴，故此東鐵西鐵及專線巴士每日一早一晚逼到爆。如分析師F想話跟隨公司搬往港島東，事實上係知易行難，新界北樓價與港島東樓價相差萬五至兩萬元一呎，點搬呀！住公屋嘅，更加一世劃地為牢，郁都冇得郁。因有此結構性差異，市區樓宇與新界樓宇之差價，只會愈拉愈濶，並無縮窄可能。

　　電台節目主持N老早搬入鴨脷洲，現在慶幸自己選擇正確，有咗地鐵南港島線之後，去中環好易啫，唔使再受香港仔隧道或薄扶林道塞車之苦。佢經常早出晚歸，冇乜留意居所附近街道情況，佛誕放假之日，佢偶然得閒，到街上走走，發覺街上多咗類似外國大學宿舍內之洗衣小店，洗衣店面積不大，為數幾架自助洗衣機乾衣機，不少附近街坊前來洗衣乾衣，店內設有遊戲機畀客人在等候乾衣時打機打發時間。主持N發揮記者本色，八八卦卦咁問人點解幫襯洗衣店，一位男士話：「你新嚟㗎！咁離地嘅？我哋搬入鴨脷洲納米樓，洗衣機擺唔落吖嘛！」主持N又問另外一位女士，女士細細聲講：「住劏房吖嘛！」

　　主持N同左丁山講：「原來納米樓與劏房衍生咗一個新行業，就係自助洗衣店，依家納米樓愈起愈多，劏房數字有增無減，呢行有得做喎。不如你開一間，打開知名度之後，就變成特許經營，招收加盟店，跟住搞IPO！」想得真美麗，我哋想吓之時，人哋大財團已經做咗好多嘢，譬如新世界集團不久前就收購咗一間洗衣公司，係機構性嘅，專為酒店及大機構員工洗衣，但既有營運經驗，稍一變身，開多一間附屬公司專做納米樓、劏房戶生意容乜易呀。香港樓市結構奇特，居民移動性低，面積細小，劏房眾多，細到連Panasonic招牌貨（愛妻號）都擺唔落，恐怕家電公司以後都要針對市場需要，推出自助洗衣機租（lease）或賣畀呢類洗衣店咯。