搬往港島東

　　中環甲級商廈租金日高，古老大律師行、大核數師行、外資證券公司已頂唔住租金壓力，陸續轉移搬往鰂魚涌，益晒太古地產，因為有名你叫，太古坊就是太古地產名下物業。英資大公司之中，置地在香港三十年來，不見有地產投資大動作，自遷冊後，只能緊守祖宗中環地王物業，成為不進則退格局（以地產投資而言）；會德豐老早已成為華資控制嘅公司，唯獨太古地產早着先機，八七年間投得金鐘地王，復於糖廠街華蘭路一帶不斷併購舊工廈、舊樓、打造一個鰂魚涌商業大廈帝國，確係有眼光有能力，可成為收租股股王。

　　不過經營商場方面，太古地產就差一皮半皮嘞！譬如將九龍塘又一城控制性股權賣咗，便是一個失着；又譬如自重組太古廣場租戶，趕走一啲外國人最有集體回憶有27年歷史嘅Dan Ryan's與Grappa's，就令好多熟客感到莫名其妙。南華早報網站於6月4日有一段報導，Iconic Hong Kong restaurant Dan Ryan's replacement Operetta closes after less than two years.講及Dan Ryan's被逼離開之後，新餐廳Operetta捱咗兩年，要換招牌嘞。連地盤總監惡佬明都嘆息：「Dan Ryan's生意好好，我都有帶兩個仔去食扒，抵食夾大件，都唔知幾多人幫襯，但太古係要佢走，引入新餐廳，口碑麻麻嘅啫！」又聽到消息話太古廣場三樓嘅COVA，好靜局，係飲下午茶嘅好地方，但可能要搬到其他樓層喎，總之新一代嘅商場管理人嘅經營手法確係「新鮮」，譬如將生意極好嘅Domani意大利餐廳趕走，換上一間英國菜式餐廳，現在咪又係水靜鵝飛！或者左丁山一代思維老化咯，唔係幾明白所謂新潮及年輕化嘅意思。

　　一日撞到一位分析師，佢話自細（由中學開始）就睇左丁山，現在已成為研究部董事，即將由中環搬去鰂魚涌，交租畀太古地產，公司董事會認為租金要慳喎。公司可以慳租，分析師就嘆息：「我在新界北區買咗樓，返中環還算方便，去到鰂魚涌就幾煩，想話搬去太古城或北角，交易費用太高，先賣（樓）後買吖，還是先買後賣呢，諗吓都煩死人，兼且印花稅高，無端端交幾十萬印花稅，又係好痛苦！」咁就茲事體大，要諗清諗楚先，老中青三代香港人皆為買樓換樓呢件事煩死也。