中資佔中

　　餐飲M以前在史丹頓街開地舖賣西班牙酒、醋及食物，後來因為加租，索性搬咗去柴灣工業大廈，租金大減，現在專做批發及直銷畀食肆，工作時間冇咁長㖭。呢日佢從工廈出嚟，竟然碰到一對歐洲人帶住黑超周圍望，柴灣比較少見外國人，於是望多兩眼，原來係彼此認識多年嘅室內設計師B。B君專做餐廳裝修設計，二十年來寫字樓一直係在黃竹坑，點解會在柴灣街頭出現？設計B講：「黃竹坑嗰邊租金貴，加完又加，我逼於無奈，搬嚟柴灣，每個月慳番好多。」B君新寫字樓亦在工廈，與餐飲M相距不遠，因商廈租金不斷上升，港島大趨勢係由中上環搬去東區，最遠去到柴灣。

　　律師W話大律師行如孖士打，Freshfields呢啲響噹噹名字都搬去鰂魚涌，投資銀行領袖高盛亦自中環中心退租，搬去鰂魚涌租五層做後勤總部，以後鰂魚涌太古坊一帶將有不少高薪外國人士出現，帶旺西式食店。現在中環甲級商廈呎租動輒一百元以上，鰂魚涌就收呎租六七十元，折讓價好吸引。

　　記得個幾星期前與一位外資租務代理行高層B傾起，佢話由於政府要保育中環街市及前政府合署西翼，浪費黃金商業用地，中環大地主暗中偷笑，明知中環在未來都無可能有甲級商廈（起碼一百萬平方呎，一流管理之智慧型新式商廈）出現，故此放膽加租，搞到孖士打、高盛等都要遷移，好快就有人跟住走，例如一向在萬宜大廈嘅DBS唯高達證券遲啲又會搬去太古坊。

　　唔去太古坊嘅話，就搬去九龍東，在沙田新城市第四期佔地幾萬呎之JP摩根大通後勤基地，就是如此，總之就係「水去低流」，租金平係吸引力大啲嘅。但係租金貴嘅地方，邊個承租呀？高層B話：「唔駛驚，好多內地民企，特別係上市公司，已成為一股新興勢力，唔怕租金貴，有機會就進駐中環甲級商廈，要威一威！」原來如此，唔怪得在中環見到不少OL，打扮舉止，似足香港人，但一開口就講純正普通話，相信就係內地企業嘅職員，遲早普通話會取代英語成為中環最流行「官話」。有一位內地生參加新亞校友會，廣東話好純正，佢唔講，唔知佢來自北方，佢話：「有不少同學留港工作，識講廣東話好方便，此則要多謝中文大學要我地必修粵語咯，四年下來，點都學曉廣東話啦，我在科大港大嘅大陸朋友到現在仍然未識廣東話，佢地話在香港生活都幾唔方便！」