高樓價怎麼不跌

　　一位新加坡南洋理工大學經濟系副教授名叫葉秀亮，過往三四年來，不斷在信報發表文章，論斷香港樓市，指香港樓市必跌，點知其間香港樓價不斷上升，如果有人睇咗葉教授之嚇人文章而早早見高價出貨，今日見到樓價屢創新高，可能心理有啲不平衡。4月19日，葉教授又有鴻文在信報B13版發表，指香港樓股前景堪憂，會從高位回落六成至七成（即是將目前樓價乘以三折或四折，千五萬嘅樓會跌到450萬至600萬），回復到2003年沙士最低價。

　　同葉教授辯論就無乜謂，世界上總有好友淡友之爭，股市樓市永遠有末日博士出現，關鍵在於「何日」是「末日」，明年吖，還是十年後？經濟有循環，樓市有起跌，自然不過，但當一切指標指向樓價上升之時，葉教授大膽預測樓價下跌六至七成，除咗讚佢大膽之外，仲有乜好講？2017年初，有不少大行分析師預測香港樓價下跌一至三成，結果全部落空，分析員要換眼鏡，今年不敢多言了，市面上幾乎全部是唱好派，人人都棄熊就牛。

　　左丁山常說本港最影響樓價大跌嘅因素係失業率，97金融風暴後失業率最高去到8.7%，加上沙士摧殘，所以樓價插水。依家冇沙士（希望永遠不再來），中國經濟增長率6.8%，IMF預測2019年全球經濟增長3.4%，即使中美有真的貿易戰，香港人仍然不愁冇工做，目前失業率低到2.9%，橫睇掂睇都唔會在未來三年上升至8.7%，而按揭息率又係橫睇掂睇都不會升番上6%至7%，近期金管局不斷買入港元，維持聯繫滙率於7.85不變，對恒生指數並無多大影響，大家唔駛恐怕甚麼國際大鱷狙擊港滙及沽空恒指。復活節假期之後，左丁山因事行入廣東道北京道，見到Gucci、Cartier兩名店門口出現人龍，回復昔日情況，即時問一問一位瑞士貴價名錶嘅客戶經理（世姪女），佢話呢排做到氣咳，生意好好喎！再睇番香港家庭收入中位數（永遠報細數嘅數字）近年上升到一萬六千多元，只係升幅不及樓價已而。目前最刺激市民不斷買樓嘅理由係土地供應不足，香港人一方面話冇樓住，另一方面又有人以環保理由反對開發任何新土地，於是釀成一種理性預期，香港土地不足，買樓趁早。