早餐與理髮

　　中環街市對面，祖庇利街有一條小橫巷，得一百幾十呎長，叫做「鐵行里」，就在中環中心後面。呢條鐵行里有五六間小店，都係小型食肆，其中一間叫「新香園」，每日早上生意好到不得了，店內只可擺三張細枱，曾在巷內門口擺多兩張枱，最近就時有時無。無論如何，呢間新香園一定年年賺錢嘅，否則邊度會年年放暑假東主外遊，關舖兩星期吖！左丁山估計老闆一定係自置物業，如要交租，點會捨得閂門唔做生意去遊埠呀！

　　前幾日有在中環中心上班嘅朋友告知，新香園已發出結業通告，4月27日關門大吉，多謝各方人士光顧25年咁講。朋友為此若有所失，佢食慣新香園之多士與餐蛋公仔麵，之後要另換「供應商」也！

　　如此光榮結業，想必有內情，於是問一間地產代理行，鐵行里最近有無成交，不久就有答案，探子回報：「新香園是自置物業，剛以二千萬元賣出，可能係老闆趁有高價，變現退休去也！」一間小巷內之小店，竟值二千萬元，果然係有土斯有財，香港地開門做小生意，一有機會必須買舖，幾十年後就會成為自己嘅豐厚退休金！二千萬元，買有6%回報嘅證券，能收股息百二萬，對老人家來講，生活遠勝於朝朝凌晨出門開舖嘅工作生涯。

　　買家以二千萬元買入一間老殘小店，打乜嘢算盤呢？線人話：「你同佢定，我睇一定係有人收樓，低調收埋街舖，整幢大廈都幾殘舊，或者有重建價值呢！」唔，如此推論，唔會錯得去邊。香港地太陽底下無新事，高價收舖，必有後着。左丁山雖非新香園常客，亦覺得實在可惜，街坊傳統小店日漸消失，唔通中環早餐客一定要幫襯翠華、太興、太平洋咖啡與Pret A Manger？但歲月催人，舊人舊事唔會永遠延續嘅。星期五在陸羽飯聚後，本想去飛髮先，點知收到間接轉發過嚟嘅短訊，余道生行一樓之美華理髮麥師傅已在三月底歸天，享年九十。過去十幾年，左丁山一直幫襯麥師傅剪髮，由舊龍子行開始；龍子行拆建後，麥師傅話與余道生行幾位余先生相熟（好可能係佢嘅客仔），得到關照，可以搬去余道生行繼續營業，佢在中環做理髮超過70年，董建華曾是顧客，黃偉綸局長與不少馬主係佢客仔，剪髮剃鬚只收140元，以後在中環成絕響了，真是十分遺憾！