独立屋平租

　　与旅游R在iSquare南海一号食完午饭，拜拜一声，自己要搵路行，唔落地铁站，直行去天星码头搭船过海（左丁山有资格免费），再经IFC行番写字楼，行路时间足以消化一餐午饭。

　　出咗天星码头行到IFC，遇见外资经纪行联席董事，专负责豪宅租务嘅测量K，顺口问佢好唔好生意，测量K话：「你话呢！现在外资对香港持观望态度，暂时延迟派新expat来港，我少咗一批客户啦！不妨你同我租番一间house，只系十二万银租一个月！」食我只车咩，咁贵？测量K话：「南区独立屋，租开15万，业主有几间屋有租约嘅，点知有三个外国租客驻港够钟调走咗，新人唔知几时到，业主猛咁搵人接手租，所以肯减租益你呀！」

　　今时今日，月租12万确系几虾人，如果唔系公司畀租，要租客自付，即使系高层管理人员，都觉得肉痛。今天跨国公司为海外雇员租屋，已无30年前咁疏爽，计数计得好紧要，要求多多之雇员（例如人工高，租金高，子女教育津贴高），一遇上经济不景气，就成为优先炒鱿人物，想襟玩啲，就唔好要求在香港住大大间独立屋。

　　左丁山对测量K讲：「你叫业主放盘卖啦，横掂佢早年买番嚟，已赚到笑。」测量K话：「鬼唔知，但见过高价之后，要佢劈价几百万，佢又唔舍得，虽则仍然赚好多钱，偏偏现在大型独立屋几难出到手，有几个原因，（一）强国人来港买呢类屋人数大减；（二）豪宅单价高，本地人识得要求业主大劈价；（三）供应量系有噃，因为一啲早期买入独立屋之富翁，现已系七八十岁，上落屋内楼梯不便，我知道有几位就系落楼梯仆亲，要入医院个几月，断骨也。老富豪?家时兴住一层几千尺嘅豪宅（例：Opus）或买相连单位打通，而要卖走自己间复式独立屋。」乜独立屋冇?嘅咩？测量K话：「两三层高嘅?系油压式，比较慢，成功人士多数钟意快，行楼梯，点知人老了就易生意外！」原来如此，老富豪竟然有此问题，以前未谂过。年轻富豪有机会嘞，三十几岁就大发嘅科技人，不妨谂谂。与测量K拜拜，未行到IFC已收到一位朋友短讯：「我买唔到口罩，屋企附近断货了！」使唔使咁惊呀，武汉不明肺炎杀到埋身咩？如重演2003沙士一幕，林郑月娥都几难翻身。碰啱食衞局局长系得把口嘅陈肇始，香港人唯有自求多福努力清洁！