小G聽到左丁山讀中六時嘅「睡房」係廁所上面嘅閣仔，大感驚異，追問點解。有乜點解啫，當年香港房屋少，絕大部份人口住在木屋，唐樓板間房，徙置區，甚至洗衣街過咗亞皆老街向太子道方面，沿街都有僭建物，有露宿街頭人士住在入面。父親戰前住在西營盤第一街、第三街，家境唔錯，後來初中畢業在中電搵到份工，就搬過去住在紅磡電廠附近，好似係蕪湖街，後來日本佔領香港，舉家搬回東莞鄉下，和平後一年父親一人回港向中電報到復工，我地仍然住在鄉下大屋（三間，還有一個曬穀場在屋後，有三分一個麥花臣球場咁大）。唉吔，國民黨敗走，共產黨當權，乜都冇晒，大量廣東人倉皇來港投靠親戚，香港一時之間，難民滿街，邊度有屋住吖，好彩嘅就到鄉親舖頭朝行晚拆（其實應該係朝拆晚行，不過講慣咗係咁），唔好彩嘅就去山邊僭建木屋，擔驚受怕。點知好彩與否因時而異，姨丈後來就受惠於徙置政策，由木屋搬上石硤尾徙置區，我家由住在舖頭，搬去板間房（相等於今日之劏房），冇資格入住徙置區及公屋。
香港房屋短缺，由1950年代難民潮開始，1962年又有難民攀山越嶺而來，聚居於山邊木屋，令港英政府為
房屋供應疲於奔命。日前在蘋果評論版睇到有一篇文章講新移民霸佔公屋，原來有此結論皆因作者將新移港界定為來港二十年之內地人，不同於王于漸教授嘅「香港團結基金研究報告」之定義，王教授團隊筆下嘅新移民係居港五年嘅，新移民之定義有咁大唔同，得出嘅「移民佔公屋比例」當然大不相同，如果將定義擴闊到左丁山姨丈（與香翰屏將軍同輩，同時期逃來香港）嗰一代，香港公屋之新移民比例係百分之九十幾都唔定。到咗21世紀，已無難民來港，新移民主要係每年持單程證來港之人士，理論上係家庭團聚，已有居所（多數係公屋），每年不足五萬人，按理不應對房屋需求增加得太多，睇嚟目前私人房屋供不應求，大部份與「增加了的財富」有關，好多人到咗結婚階段，不甘於與父母住在公屋或私樓細單位，而又有銀紙支持，於是產生住宅之剛性需求（左丁山結婚之時係租一間鄉村石屋內之梗房），唔係嘅話，點解細樓新盤會咁暢銷呀。香港納稅人數目不太多，加上稅率低，歷年藏富於民，官方統計數字難以發現，一定低估咗香港人之購買力！
App下載
