呢日坐地鐵，入到車廂，見到優先席有空位，於是坐低。開車後，冷不提防隔籬一位長者模樣，打扮普通嘅男士對左丁山講：「信報冇咗練乙錚專欄，舊老闆話總編輯有失斯文，你有乜意見呀？」呢位男士好似識得左丁山咁，問題問得咁特別嘅？又唔知佢係邊位，正在諗吓有無模範答案之際，男士又講：「我在書展見到譚衛兒小姐，我問佢點解將體育版搬去Business Page，篇幅又少咗，主要新聞多咗講大陸，長篇大論，悶親人。我睇早幾十年Morning Post，自細聽老師講，睇南華早報學英文，一路到依家，張報紙似乎每況愈下！」
哦，呢位男士可能係退休有知識之人噃，否則點會睇呢兩份小眾報紙？硬着頭皮都要答兩句啦，好彩只係搭一個站啫，好快就會落車，實唔會俾佢問到口啞啞。左丁山講：「唔要練乙錚專欄多數係政治取向問題，新老闆同舊老闆意見不同，總編輯嘅糧係新老闆出嘅，又係新老闆聘任嘅，你想佢點做吖？至於是否有失斯文，呢個報業行頭久已唔記得咗有呢回事，報紙罵人用字之兇狠，根本不知斯文為何物，好多報紙專欄之消失，全部係副刊編輯一個電話就搞掂，駛乜麻煩到總編輯以及大老闆噃。」
至於南華早報，人地似乎已定位為一張面向地區／國際人士、專門報導中國發展之英文報紙，重心不在於香港新聞，你如果識中文，識睇中新社、新華社、人民日報等等，就唔駛透過南早嚟認識中國啦。但香港係國際城市，有好多外國人或者係睇唔掂中文嘅回流香港人，南早用英文寫中國最新國情，可能幾迎合佢地所需。目前香港中英文報章各陷入廣告蕭條困境，正各展奇謀以求生存，轉身轉型係方法之一，老讀者唔鍾意，當聽唔見，睇唔到便是。
未講完，車已到站，左丁山起身鬆人。一路行，一路想起練乙錚同情本土派及反梁嘅論點，有時幾難得到多數人認同，但無可否認，佢對一啲技術性問題之認知，確係只有一個學術研究專家先至可以發掘，發揮得咁詳盡，例如佢寫近來南海仲裁案，愛國人士幾難駁到佢。記得廿零年前，左丁山到過科大學生飯堂同練乙錚及雷鼎鳴食餐「頹飯」，大家談笑風生，當時科大商學院有陳玉樹、陳家強、鄭國漢、練乙錚四大名師，眨眼間只有雷鼎鳴仍然留在科大，佢嘅政治立場與鍊乙錚變成南極北極，歲月固然催人老，亦會完全改變一個人嘅思維。
App下載
