Call loan的事搞大，對貸款人比較好

　　剛去了台灣幾日，不時有人問我銀行有冇向我call loan，因為有住宅按揭貸款的人話，他依時還款，銀行仍然向佢call loan，搞到佢臨急臨忙要賣樓，蝕了百幾萬，他將件事放上網，搞到人心惶惶，銀行又唔作出解釋，只是話個別事件，強調銀行不會向依時還款的客call loan。

　　莫講話私人住宅貸款，就算商業貸款，銀行都很少向依時還款的按揭客人call loan，除非物業大幅貶值，不過銀行對商業貸款一般是四成，最多是五成，就算樓價下跌兩、三成，仍然是非常安全，除非客戶拖欠供款，又唔肯與銀行協商，銀行一定會call loan，就算樓價上升，而客戶拖欠供款，銀行一樣會call loan。

　　今次call loan 事件愈搞愈大，有人話影響香港金融中心地位，我認為不但唔會，反而令銀行小小心心，就算客戶拖欠供款，都不會輕易call loan，其實，問銀行借錢買樓的人最怕銀行以樓價下跌為理由而call loan，我自己亦試過，在環球金融海嘯的時候，有銀行將我們所按的物業估價在短短三個月內下降一半，我們二話不說，還清所有欠款，以後當然唔敢與那一間銀打交道，銀行亦知道，無端端call loan，很少客戶可以再做生意，所以，除非迫不得已，銀行都唔會call loan，可能很多人都唔知道，call loan 是要申請，很麻煩，銀行職員免得過都唔會call loan。

　　Call loan 事件之後，財爺以及金管局總裁都表示，如果準時還分期，銀行是不會call loan，我唔敢講這是一個保證，但可能是對銀行一個指示，要求銀行不要向準時還款的客戶call loan ，否則大家都很麻煩，所以，我們應該要多謝那位將call loan搞大的人，不過，大前提是大家要準時還款，否則銀行一定會call loan。