業主要有攬炒的準備

　　有租客以講笑的形式話為了響應零售業協會的提議，要求我減租五成。我亦以同樣態度回應，我減租其實是害了他。因為勇武者現在準備攬炒，就算開門做生意，三日唔埋有兩日示威，隨時又會出現三罷，做多一日生意就蝕多一日。如果可以，不如暫時結業，遣散所有員工，三兩年後局勢如果可以平靜下來再考慮重出江湖。到那時候，租金又平，人工不但平，而且仲勤勤力力，不如休息兩三年。老友話唔得，有一班老伙計跟著搵食，唔可以攬炒。我話既然係咁，就冇辦法，唯有希望唔好被攬炒。

　　其實，舖位業主已經比較好一些，而事實上不時有一些小型單位業主會被租客要求唔好追租，否則就攬炒。意思在單位內燒炭，該單位立刻會變成凶宅，樓價即插50%，業主立刻變成負資產者。有一些業主聽到之後不敢收租，或者靜靜地將那個單位連租約賣走。那些業主最後會發覺，新業主收租是沒有問題，所謂攬炒，只不過是租客恐嚇業主。不過，亦有機會發生，所以做業主的一定有攬炒的準備。如果怕被租客攬抄，不如唔好做業主。

　　世界上有大多數業主都很好人，他們認為現在時勢不佳，與租客共度時艱亦不為過。不過，他們不知道一件事，就是那些出租物業有向銀行借錢的話，業主是無權減租，或者是先要得到銀行同意，就算銀行同意業主減租5%，為期6個月。如果在6個月之後，租客交回原有租值就沒有問題。如果租客話經濟繼續下行而決定結業，銀行是不會以原有租金計算，是會以減租50%後的租金計算，有機會向業主追收差額。業主最後是方便了別人而害了自己，倘若業主最初不減租而租客選擇結業，銀行不會將租值下調，亦不會向業主追收差額。這個微妙情況並不是太多人了解，不過減租並非不可行，但要等經濟環境降到谷底，租客只要捱多一段時間便可以見到曙光，業主才可以考慮減租。幾時到谷底？這是一個問題。