地產論壇
登入名稱
密碼
頁數:
減「自由行」,又一項有破壞,冇建設政策
瀏覽人次:58602    回應:99

減「自由行」,又一項有破壞,冇建設政策

 

湯文亮博士

紀惠集團行政總裁
2014年6月3日

  CY突然宣佈,考慮減自由行人數20%,雖然只是講吓,已經震散零售股,單日蒸發百多億,不過,又沒有基層市民或者團體表示大力支持,而從事旅遊及零售行業的人均愁眉苦臉,因為他們知道,政府真的是削減自由行人數,將會令到蓬勃的消費市場馬上降溫,業界搵食的人就會艱難得多,而且,他們從政府實施限奶令和辣招的做法,都是易設難撤,一經定案減少自由行人數,就唔知道幾時才會恢復舊觀,就算恢復又如何,到那時候已經可能沒有人有興趣來港,而我認為,削自由行人數政策,與限奶令與辣招一樣,屬有破壞,冇建設的政策,我真的唔知道點解,香港政府那麼熱衷那些政策,還沾沾自喜,其實,那些政策令香港的競爭對手沾沾自喜才真,究竟CY及主要官員知不知道,他們引以為傲的政策其實是帶領香港走向滅亡,或者,香港要與澳門一樣,立法通過過去,現在,未來的特首及主要官員免責法,否則,在他們離任之後,一定會給市民與及中央政府秋後算帳,如果香港立法會通過這條免責議案,官員們可以肆無忌憚,有破壞,冇建設的政策陸續有來,香港人真的是很可悲,想過一些安樂日子也不可以。

  人常說,曹操都有知心友,關公亦有對頭人,自由行的確令有一些人不方便,這與交通擠塞大同小異,每一日返工,中環都非常塞車,放工又輪到銅鑼灣,旺角,住在那些地區的人的確不方便,唔通他們又走去立法會請願,又或者叫CY立例限制到中環等旺地的人數,其實,這只不過是幾個驅蝗人士的傑作,我相信他們當中有人正在領取綜援,無事搵事做,做吓show,出吓鏡,過吓日晨而已,誰不知我們的行政長官如此認真,竟然說減自由行20%,我聞說,我們的行政長官做生意不甚成功,睇落亦有多少道理,做生意之道,比顧客永遠是對的更加重要的就是千祈唔好趕客,趕走咗就不會回頭,減自由行,與趕客有什麼分別,講吓都唔好。

  長官這樣說,令到有不少省市對香港有意見,他們自己會限制來港的人數,同時,當香港人到那些地區投資,所遇到的困難將會比以往大,這叫做以其人之道,還治其人之身,香港有限奶令,深圳同樣有限奶令,如果帶超過1.8公升奶粉出境,一樣會受到處罰,不過,就沒有香港那麼重,我很奇怪,什麼人可以想得出那麼多毀滅香港的政策,如果減自由行的政策出台,將會有更多類似驅蝗人士出現,他們又會要求政府禁乜禁物,CY將會應接不暇,或者他是喜歡的,因為這是挑戰,不過,大多數香港人會以「挑」來回應,我唔明白,為幾個人意願而犧牲大衆利益,點計都唔化算,點解仲要一意孤行,實在令人費解。

減「自由行」,又一項有破壞,冇建設政策
1. 睇得通
2014-06-03 08:36
香港沒有工業,沒有土地,沒有資源,沒有礦山,沒有農業,只有海水...........停止自由行,停供商貿發展謀生機之源泉.........香港只有死路一條.......飲海水飽........
2. 對待驅蝗人士
2014-06-03 08:44
內地人對待驅蝗人士, 只需報以一笑, 甚至恥笑, 就已足夠. 大家還記得朱總理, 回應記者問, 說一切有利於香港的, 中央都...下刪一千字, 驅蝗人士的腦袋是多麼的理所當然, 難得有人陪佢地癲.
3. 山高雲低
2014-06-03 08:58
减自由行,一個字講晒:蠢。
正確的做法是,搞大而不是龜缩。 
搞大自由行,撤限奶令,撤辣招,收雙非,建國際學校。 
等等,等等才是有利香港的良策。 
但政府逆其勢而行,反其道而不知。 
除了蠢,我不知如何形容。 
嗚呼,政府無一能人。

4. k仔
2014-06-03 09:13
CY 只會帶領香港走向滅亡之路,不論政治上、經濟上,屎忽鬼 !!!!!!!!!!!!!!!!!!!!!!!!
5. 大人物做大事,小家種專理閒事。
2014-06-03 09:37
香港人有時人有三急 ,想在鬧市借用廁所都不容易 ,不熟路的旅客 , 小孩在路邊解決 , 千中無一 , 全球都會發生 。報章日日頭條 , 驅蝗惡化米飯班主成過街老鼠 , 有錢係袋你驚冇地方使?如果我係旅客 , 你加額自由行我都費事來。
6. To 5
2014-06-03 09:53
外國大人小人都周街痾啦, 驅蝗人士沒有見過大蛇痾尿? 宗主國大英同法蘭西, 當真人人俾五蚊痾一篤尿?
7. 施政失誤令上水塞
2014-06-03 10:05
如果香港入境處與海關協調, 將一天多行的人搜查, 水貨客已可以掃減, 上水即可安寧, 無需放大問題, 梁特首將自己政府的施政失誤歸究於所有來港的同胞實在可恥可悲。
8. 路人N
2014-06-03 10:20

 

只要搞兩個邊貿城, 讓那些水貨客和買日用品的在那裡買個飽便可以大大減輕旅客及水貨客對北區的壓力, 一舉數得.

在香港邊境自己搞商貿城, 點都快過同中央及其他省市傾一簽多行呱!  為何不做???

9. 小陽
2014-06-03 10:31
整個社會比1997年有錢左,樓價超過1997 有乜出奇。

Therefore , 要樓價跌好容易,整衰香港經濟就得,唔使起那麼多公屋。

10. Albert
2014-06-03 10:40
"五十年不變!".........CY唔通想HK嘅政、經去返97年水平?
而且,更想"超額"完成!
11. 哈哈
2014-06-03 10:41
其實,這只不過是幾個驅蝗人士的傑作,我相信他們當中有人正在領取綜援,無事搵事做,做吓show,出吓鏡,過吓日晨而已,誰不知我們的行政長官如此認真,竟然說減自由行20%


我相信你講嗰"幾個驅蝗人士"俾你呢道嗰班"網上隨從"多出百萬倍
12. To 11
2014-06-03 11:02
直接或間接靠內地人和物資維生的人, 包括很多學歷比較普通的人, 比你嗰班"網上驅蝗隨從"多出又百萬倍. 特衰正苦整冧地產相關行業, 再整一個自由行相關行業, 多出來的那些人的生活和正苦財政收入缺口, 是又找納稅人買單了?
13. 四眼仔仔
2014-06-03 11:34
博士--一句讲哂“當局者迷”,絶大部份人都觉得自己英明神武,但其實香港甚少政治人材,好似个啲搓my Bs都行得出嚟,彭定康都好想问佢一你戒咗奶未?稍有能力嘅人,早已睇清形勢,九七後嘅社会文化等等,均已棄官從商,講多無謂,自求多福。好似成哥咁講,無能力嘅爭住嚟做,好似上面啲巴打咁講,开几个边贸城分流吓,唔使話有錢都代唔切,依家啲真大款已經自己去欧洲買嘢,我哋都稔到嘅嘢冇理由政府稔唔到,唔达标係咪自己嘅能力问题。
我唔想信cy可再玩多5年,若果我睇錯,各巴打便应孝慮自己将來係边度退休了,所以現在最担心嘅係东方之珠嘅光辉会被陰乾,畢竟是一个生于斯長于斯嘅地方。

14. middle middle class
2014-06-03 12:16

山高雲低, 政府都是壞能人, 破壞香港, 帶領香港走向滅亡之人.

Dr Tong, totally agree with your comments, "趕走咗就不會回頭,減自由行,與趕客有什麼分別, (?) 講吓都唔好。"

15. nobody
2014-06-03 12:51
其實香港生意太好,入境可以加價,例如一簽多行收手續費,正常來香港返工都唔會一日幾次啩,咁就可以解決好多問題。
不過,大陸人亦有太多"恩威並施"既心態(恩主心態+威脅斷水糧),如果市民冇直接得益,又唔比D補償,民意好難扭轉,CY係民椊治港,有民意基礎,佢就可做3D限奶等既7事。
16. Peter Paker
2014-06-03 13:31

正如 bsd一樣,好多人以為港樓係大陸人炒貴,實際上樓市上升係由本地人推動,出bsd 又有咩用?

翻翻轉頭,如水貨客大多已經是香港人去做,現在實施限制一簽多行,能有用嗎?問題核心係大陸人對港貨的需求。


老實説,大陸已騎劫香港經濟及就業,一個政策令到數千及上万人失業,值得嗎?


 2002 - 03年,我開OT開到儍,連續翻工90日冇放假、連續係 office 工作72小時、每晚收工最早要11 - 12點。8.7 %失業率的威力下,send 100封CV都係冇咩回音,所以做到死,我都唔敢辭工

我曾想過不如跳出馬路,被架車撞到入醫院,我就可以有覺好瞓,唔使OT。但老豆年紀大要退休唔做,如果我 quit 左份工,唔通叫個做商場清潔賺$4000嘅阿媽養我地兩仔爺,所以當年 desperate 到極點,情願想被車撞都唔敢辭工。你有冇真正經歷過唔可以冇收入的景況?


經歷當年慘況,我好珍惜今日工搵人的景況,不過有班死靚仔唔知死,係度搞破壞,係都要倒走自己明明係袋嘅米

我當年已比其他人好運,起碼還有份工,雖然好辛苦,好多人想做都冇得做,讀完書,想一展身手的機會都冇,你地能否可以想像到當年的失業大環境是如何多麼消磨人的鬥志?

今日很多人生活於唔使咁難揾工的年代,他們不懂珍惜之餘,還要去破壞它,真的教人失望,究竟我地D小朋友變得太快、太過幸福,使到完全失去任何的危機意識,定係太幸福會使到人的本質變得腐化?

我老媽當年每個月做28日,每月只有兩日例假,每日做十個鐘才賺$4000,外判商場清潔,當時係沙士,阿媽係商場拖地洗廁所,佢都叫我辭工唔做,我當時都哭了出來。但是,我真係唔好意思去辭工,叫我阿媽養。

現實是殘酷,我明白如果當年我辭工,財政上是冇人可以幫助我地,唔通攞綜援,堂堂一個大學生丶會計師,有工唔做走去申請綜援,我自己都過唔到厘關,凌死都要咬緊牙關涯過去,直到揾到新工為止。

雖然今天我只是小中產,我有排都未夠食過世,但我有的夠我去面對任何風浪。今日回望過去,我特別珍惜今天有的一切,因為我是親身經歷一蚊丶一蚊有血有汗的賺過來,這才有意義

我在想,如果當年冇自由行及 H股IPO,我估我一定涯唔到今日,經歷過2001 - 03年的情況,我係極度反對 cut 自由行






17. 小陽
2014-06-03 14:09
 To peter paker ,
香港精神---朱莉。
其實我同你差不到,見到D人有得揀工做都好開心。
我同你差不到時期出身,D interviewer 好寸,人工有低, 好似施捨分工俾你做。
正如老豆話,除了二世祖,個個買樓都辛苦,pp兄你挨過左就係神仙
18. 小陽
2014-06-03 14:11
我都試過send 100份cv .
19. 惜緣
2014-06-03 14:27
所以又要講多一次: 香港的年青人真的是身在福中不知福。
20. 下删689
2014-06-03 14:56
To 2,
應該是下删689字。記住啦,下次不要錯。
頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。