地產論壇
登入名稱
密碼
頁數:
冇咗劏房就一天光晒
瀏覽人次:8079    回應:38

冇咗劏房就一天光晒

 

施友朋
評論員 

(東方) 2021年7月8日

  千呼萬喚嘅劏房租管終於有眉目,最快年內實施。事實上,居住係市民嘅基本需求,安居才能樂業!然而,香港至今仍有逾20萬基層住喺劏房,對於號稱國際都會、亞洲金融中心嘅香港,確實係一種諷刺!

  日前提出嘅相關租務管制修例建議,對租客無疑多了保障,譬如租期固定為兩年,租客有權續租一次,即共4年租住權保障;續租租金加幅不可高於15%;業主喺首兩年租期內不得上調租金,但可下調。另一項德政,就係分間單位不設獨立水電錶,業主向租客收取相關費用時,必須提供繳費單副本等。呢項防止水電費濫收,應該一早就做,皆因經常見到劏房戶投訴被業主濫收費用,一到夏天,夜晚唔開冷氣根本瞓唔到,電費通常過千元,若然又被濫收,基層真係百上加斤!

  草案建議若業主要求租客繳付租金、按金、水電、煤氣或石油氣費等以外嘅款項,便有機會構成罪行。若業主超收款項便有機會被定罪,首次定罪將被罰款1萬元,第二次或其後再被定罪,則被罰款2.5萬元。而業主若收取租客公用設施費用如水費、電費等款項高於繳費單款項,亦會被罰款。住劏房嘅基層收入有限,若仲被業主濫收水電費,確實好陰功!

  其實,政府冇為起始租金即最初租金制訂標準,令有些劏房平均呎租逾50元,分分鐘貴過豪宅,正如有劏房戶話齋,真係床頭瞓覺床尾煮飯,咁貴呎租,合理嗎?亦有住客批評15%封頂過高,以一個5,000蚊嘅劏房計,加15%都成750蚊,如果加3%至5%就合理啲!業主與租客各有各嘅盤算,如何平衡,有排拗!不過最終都係要政府覓地起多啲公屋,冇咗劏房就一天光晒!

冇咗劏房就一天光晒
1. 望東樓
2021-07-08 12:27
係香港擁有中學嘅學歷都應該知道係自由開放經濟體,價格由供、求主導而唔係政府嘅規管。咁嘅租管只會令劏房戶更痛苦(未來三年租金預期加幅係提前體現)。或者過去幾年因為黑暴橫行,樓市半生不死,舊樓統一業權進行重建似乎進展良好,對劏房供應雪上加霜。早前經過紅磡大酒店,見對面五、六個blocks (唔係棟)正進行重建。可以想像其中大量劏房因此而被消失。
由咁嘅人領導香港真係可悲,但竟然有人出嚟寫文讚咁先另我有想吐血嘅感覺。
2. 引刀一快
2021-07-08 12:36
一個飛地,香港九成問題即刻搞掂。
3. 望東樓
2021-07-08 13:22
係內地建長者屋,將獨居長者遷徙過去可以最有效解決問題?
4. 引刀一快
2021-07-08 13:36
東樓兄

一塊飛地,做嘅除咗為香港慳錢,更加應該係為香港賺錢,兼為國家賺錢,乜人都一齊上去,做好一個位,咁大灣區有望喺十五年內人口破億。
5. 望東樓
2021-07-08 13:39
小刀,尋日有人訪問黑石嘅COO(注意只係COO而唔係首席策略師!)問佢當下投資大方向。佢話舊經濟(比方一般零售業)等收旗;投資者要擁抱新科技/產業。更提及可以注意幾個地方嘅房地產,深圳係大中华区唯一被點名嘅地方。

6. 引刀一快
2021-07-08 16:40
東樓兄

俾條link睇睇,唔該。

如果深圳得,廣州佛山東莞都一定得,如果飛地,成個大灣區都得。

睇數據只係了解事情嘅一部分,其餘要實地講體會。coo起碼兩年冇去過大灣區喇。
7. phILIP HK
2021-07-08 17:19
香港有相當一部分的劏房,是包租公經營的,沒有了自己的業權,還可以保證受租年期嗎?相信好快就有大比例的劏房結業,政府的德政,別變成損政,不知當局是否對這種情況已經有所了解,別別別讓條例生效之日,就是租金上調之時,劏房未受其利,先受其累啊!
8. 望東樓
2021-07-08 22:00
我唔係用browser睇,所以無link。來源係彭博新聞。BTW大灣入面邊區最識合老人家安享晚年?
9. 引刀一快
2021-07-09 00:09
大灣區,要醫院好,就廣州,其次深圳,深圳返香港快。
如果唔依賴醫療,其實度度都好,有平有貴。
個人推薦,冇當地人親戚的話,以廣州為核心輻射出去,為佳。然後就係深圳,下一個係珠海。
其他,睇住手頭錢嚟揀。

10. Hongkong People
2021-07-09 08:45
刀兄,

點解深中通道快通嘅中山唔好呢?呢幾年東莞樓升得咁勁,都係因為近深圳承接深圳外溢產業而帶來嘅效益!

深中通道係國家級嘅百億基建,雖然呢幾年中山樓升咗唔少,但係大灣區都係平,深中通道落成後,有望承接深圳外溢產業,引入高端人口,樓價可期!
11. 引刀一快
2021-07-09 11:29
Hong Kong people 女士

珠海咪即係中山,我冇話中山唔好喎,不過東樓兄問嘅係養老,咁我唔會將珠海中山排第一囉。

中山更適合自己識開車,同埋活力比較好嘅人,過去經驗,深中通道效果好取決於收費,如果定得低啲,咁中山會非常受惠。
廣州醫療係省內以至南方最強,你精神爽利當然唔使考慮呢樣,但係以養老為目的就唔同,我將珠海中山養老排第三,呢個評價唔低,惠州黐住深圳,我都冇推。

12.
2021-07-09 12:24
深圳外溢去鲘門,最大嘅飛地。

澳門外溢去中山。本來最合适是横琴,但炒高晒。已不是普通人負擔到。

廣州就肇庆,佛山。

主力都係交通。
13. 望東樓
2021-07-09 13:59
依家係幫老樓打聽,咁當然有好嘢一定會留返件畀自己。
14. 引刀一快
2021-07-09 17:35
東樓兄

老樓?還是老友?

呢排留意,唔係網簽一律迴避,一律迴避。


15. 引刀一快
2021-07-09 17:39
嗱嗱嗱,灣元正正經經寫嘢,幾靚仔!
16. 望東樓
2021-07-09 19:42
老樓者,家中長者也。
17.
2021-07-09 19:45
林引刀,

有乜唔係網签?不是必定嘅政府手续咩?
18. 引刀一快
2021-07-09 22:48
東樓兄

一時心水唔清,明白了。

見有好盤會同你分享。
19. 引刀一快
2021-07-09 22:50
灣元

學鳥5兄話齋,唔講得咁明,你真係操作自然會知。
20.
2021-07-09 23:24
林引刀,

扮砖家!油管大把片。恒大某些未有预售证,可能网签唔到。
頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。