以後多儲蓄

　　昨日講起之暫免每月供樓，行唔行得通呢？捉一位銀行朋友問一問，佢話：「Mortgage Moratorium理論上可行，但要睇銀行制唔制，小數怕長計，全香港咁多人供樓，每月現金流好大，若銀行放棄呢筆現金流，都幾大犧牲㗎。美國啲銀行之中，有啲專門Mortgage Moratorium，佢地就好難孭得起幾個月冇現金回籠嘞。但香港銀行體系穩健，照計唔怕，不過間間銀行業務不同，要睇金管局有冇牙力至得。」

　　唔，一個意見啫，財政司司長辦公室有大批經濟師，金管局又有不少研究人員，請佢地研究可行性啦，又未必個個供樓人士會去要求延期供樓嘅啫，佢地有得揀㗎。

　　至於如何援助因疫情影響而失業冇錢交租人士（例如旅行社職員），比較困難，叫業主暫不收租六個月，明年冇疫情之後欠租再分12個月攤還，技術上未必得，難以一刀切，因業主未必個個係大富翁，一啲可能係靠收租嚟維持退休生活嘅啫，租客暫停交租，小業主會係受害者。

　　左丁山與幾位朋友在午飯時吹水一輪，都無法諗得出一個實際上可以滿足不同條件失業人士之租金方案，有待特區政府財爺去研究了。

　　呢次疫情帶出幾個重要教訓：（一）唔好先使未來錢，總要積穀防饑，世界上有太多不可思議之突發事件，往往令人措手不及，手頭無積蓄，隨時要乞米。意思係，加強積蓄，買少啲無謂嘢，對甚麼內需、零售額，以後必有結構性影響；（二）退休靠收息，原來不大可靠，滙豐銀行都反口，除淨之後居然撤銷派息，跟住有歐洲保險公司，緊跟宣布唔派息，退休人士為之一殼眼淚，以後要重新估計食息策略；（三）去年初聯儲局本已開始加息縮表，後因貿易戰，再來C19疫情，反而拚命減息，以後十年相信都係零息，存款至銀行，眼光光蝕畀通脹，不如拿出一部份來買股票，至於如何買，是另一個要仔細考慮嘅問題。因C19源頭責任問題，美國及歐洲政治風向趨於責難中國，慢慢變成China vs West嘅局面，亞洲／非洲國家多數保持中立，中國經濟極大可能受損，倚賴內地人消費之生意（如旅遊），前景不明。