買口罩的煩惱

　　有老友打算買大量口罩做善事。外國口罩廠叫佢先付現金，否則，最低限度都要開張 L/C。佢問其他老友，大家都話如果開L/C，廠家畀垃圾都要收貨兼找數，就算不是垃圾，廠家知道這些是一次性交易，隨時會交一些次貨。而且開 L/C 的費用亦很高，現在已經很少人會開 L/C，有老友叫佢開 D/A 單，亦有老友話開 D/P 單仲好，佢將要求話畀廠家知道，對方話佢混吉，二話不說就拒絕了。究竟點樣才可以買到大量口罩，點解廠家不接要D/A，D/P單。

　　老友可能不明白，在疫情當道時勢，廠家莫講話不接受D/A，D/P單，連L/C 信用狀都唔會接受。因為廠家用 L/C 提款，亦要付手續費，現在是先錢後貨，廠家收到錢之後在指定日期付運就已經對得買家住，千祈唔好祈望廠家接受乜單物單，就算付了現金都未必安全。倘若口罩價錢飆升，廠家一句話口罩是戰略物資，國家不準出口，最多收回已付款項。逢商必奸都是冇錯，當然包括我在內，唔奸就唔好做商人，去做慈善家。

　　老友不明白L/C，D/A，D/P分別，我粗略解釋一下，當買家開出 L/C，只要生產商符合包裝以及付運日期，在落貨後已經可以到銀行收錢。雖然當中還有一些保障買家細節，例如可以指定由某些合資格公司驗收，不過，仍然是買家百分百信生產商。

　　D/A單就是買家收貨後，廠家就可以向銀行兌現，但是如果買家不收貨，貨物又已經到達目的地，廠家不但冇錢收，還要付倉租雜費，買家就會趁機壓價，廠家大多數要屈服。換句話說，D/A單的風險是在廠家，不過，D/A的單價會比較好。所以，廠家自會衡量風險，只會量少的訂單夠膽接D/A單，但我亦見過不少廠家因為一張巨額D/A單而出現財困，這亦是贏粒糖輸間廠的來由。至於D/P單，只不過是D/A單的延續，更加不合理，可能是收貨後30至60日才收到貨款，廠家不是實力雄厚，根本做唔到生意。不過，價錢亦會因應提高，甚至去到不合理程度，不過都是你情我願。總之，現在買口罩，唔好考慮用什麼單，先畀錢，後收貨，如果有得收的話。