地產論壇
登入名稱
密碼
頁數:
賭仔並非姓賴,姓⋯⋯
瀏覽人次:20480    回應:20

賭仔並非姓賴,姓⋯⋯

 

湯文亮博士

紀惠集團行政總裁
2020年4月23日

  有不少人知道我是澳門人,不時以講笑話澳門人最多人的姓氏不是姓何,或者姓賀,而是姓賴。因為澳門多賭仔,而賭仔大多數姓賴。所以,澳門最多人姓的姓氏應該姓賴。老友搞錯,澳門的確有很多人從事賭業,或者應該正名為博彩業,但並不是賭仔。因為賭仔的DNA早已被清洗,就算是賭仔都不是姓賴,姓賴只是一般人的誤解。其實,賭仔有一個日本姓氏,叫心甘命抵。

  在2015年,有老友輸了過億元人民幣累積期權,他二話不說,賣了幾間屋、股票等貴重物品還債。有人問佢點解唔告銀行誤導,或者可以攞番多少,老友話點告,收息都收左幾年,有錢賺的時候唔告,輸就立刻告,一定會畀人話姓賴。其實,當時大家都唔知道累積期權風險,以為是一項雖然不是厚利,但是一項穩陣的投資。其實,如果是厚利還好,反而會警惕買累積期權的投資者,微利反而變成一個陷阱,令投資者漫不經心,最後就演變成贏粒糖,輸間廠。有沒有人投訴,或者以法律行動迫他人賠償,一個也沒有。他們勉強也可以叫做賭仔,但不是姓賴,姓心甘命抵。

  油價跌至負數,買油有錢收?當然唔係。不過,如果閣下買了期油到期,就唔該提貨。如果唔提,就唯有蝕本賣。三星3175就是如此運作,以蝕本價賣5月油,但用26元買9月油。如果9月油價唔升到26元,就會蝕多轉,今次有不少投資者損失慘重,但是他們一定不會賴其他人,最多話時也命也,冇人估到油價會跌止負數。這是什麼意思?心甘命抵也。

  老友話我最近畀人追擊,真係黑過墨斗。事緣我兩年前一篇文章,我叫一對夫婦唔好買樓買匯豐,誰不知匯豐不派息,那些人唔追擊匯豐反而追擊我。其實,我也不明白,去到電台、電視台都畀人問及這件事。究竟這是什麼世界?最後我唯有話這是一個虛構故事,又畀人話信用破產,究竟應該要點講至啱,輸錢的人都冇出聲,其他人點解要咁積極,想極都不明白。不過,在另外一個角度睇,香港人變得非常關心別人,也是一件好事。

賭仔並非姓賴,姓⋯⋯
1. 鳥5
2020-04-23 11:18
我個人覺得油價第三季要上30-40之間,合理區間!大陸同美國官方正大手入!兩條友未見過造蝕本生意!第三季3175上4蚊。5難。。今日我講既!但小賭怡情!重倉都係黃金!
2. 鳥5
2020-04-23 11:28
今年匯豐,可以見48!之後就唔敢講!樓市未上車,就千祈唔好上車。過埋下年年尾先!失業率見5.5或以下Landing冇變!中聯辦正式攪正香港sysrem坐下兩個月前嘅判斷冇變!出年攪香港地覇!睇法冇變!香港出年第三季實体觸底!半年前睇法有變!
3. 鳥5
2020-04-23 11:31
更正:香港出年第三季實體觸底。半年前睇法冇變!
4. 鳥5
2020-04-23 11:34
港股第三季或之前見2萬9千!以上係今日(我講嘅)!阿媽係女人!就係其他人講嘅!哈哈
5. 鳥5
2020-04-23 11:36
坐下唔係專家!不過隨口噏!十中八!!!
6. To 1~5樓
2020-04-23 12:10
你講得咁有把握,不如你講多D你個人資料,我怕你半年後閃咗呀。
7. 路人B
2020-04-23 12:33
自話自說 !
8. 鳥5
2020-04-23 12:51
我是誰?並5係重點!又幾多中先係重點!对嗎?既然分析邏輯,抽象難以表述!咁不如下注!对嗎!以上(數字)睇法。。坐下重點最大既係!樓市D2年上車係賭最大2O至3O年美元資產合約!D舖書,其他贏到盡都幫你唔到!自己幻想下!計下數!未上車!呢兩年千祈唔好上車!
9. Philip wong
2020-04-23 13:01
小賭怡情,賭博贏錢的只有賭場庄家.賭金融產品也有風險,長賭必输,揸住黃金都怕,十年黃金變爛銅曾經是投資名言。揸住現金也不安全,大千世界,隨時印錢應急,所以現金為王也只是對特定群組有意義,手上有錢,又沒有財務壓力的人,還是磚頭够穩,如果連磚頭都不值錢,那麼,香港就如底特律,倒不如回鄉下耕田,大家一直都講,自己住,什麼時候都是買樓時候,我想加一句,低息時代,財務自由的人,什麼時候都是買樓時候
10. 小小書僮
2020-04-23 13:41
不招人妒是庸才,遠勝一班大聲疾呼都無人理采投機之士。
11. 鳥5
2020-04-23 14:59
9F,唔係話成世都唔想車!樓市係八個贏兩個書!但兩個書係指Timming.唔係價格!。。過埋出年!坐下仲叫人5買樓!我都覺得自己多事!安居樂業!先至自己不敗之地。!不敗之地係指Timming..
12. 十一哥
2020-04-23 17:18
藏富好多工具、揸梗一樣唔走位就要忍得浪高浪低、玩走位就要睇彩數…左右逢源/左一巴右一巴…係唔同感受。
住現金乜都唔落撻、肯定滾水漉朱腸。
買磚頭就一定揀大城大埠、路畸唇、timing唔準都可以守到天光、前題係托咗幾多水龍。
股票就似買馬仔、馬經日夜刨就係養草人。
實金就不如買磚頭…橫掂都係夫吡、期油/期金根本係玩O/和、咁不如過大海、賭5行好過比大老千操弄。
13. 十一哥
2020-04-23 22:04
雀仔  今次係明挾…扎住咗…眼光光冇得走、結咗就彈硬…爭在執幾多…呢鑊就係咁簡單。
14. 鳥5
2020-04-23 22:45
十一哥,我真係明,曾是過來人,盡在不言中!我只係想盡點綿力!通下水!但我都明我5係神仙!5會全中!
15. 元朗真香港人
2020-04-23 23:42
鳥5兄,你d意見很不錯。
16. 十一哥
2020-04-24 00:12
雀仔  全中 ?  投資/賭錢唔輸已經算係奇人、好多日度夜度滿口論述..唔洗度水已經係叻仔、巴非/十X哥都週時睇錯、關鍵係持貨能力…滾水都可以餚到變上湯。
我地D老散就要憑簡單直覺..見空位就狠打、諗就驚…驚就慢…慢出手就被擒拿、投資打交一樣…十一哥未輸過就係唔經大腦…全憑直覺、 未輸過…唔係未傷過、哪 ! 刀刀唔淮笑。

17. 引刀一快
2020-04-24 06:04
十一仔,有乜好笑?單講心水,我都冇乜輸過,真金白銀就另計。
直覺唔係天份天賦,而係天官賜福,肯認直覺,唔係你signature.
18. 引刀一快
2020-04-24 06:05
十一仔,有乜好笑?單講心水,我都冇乜輸過,真金白銀就另計。
直覺唔係天份天賦,而係天官賜福,肯認直覺,唔係你signature.
19. 十一哥
2020-04-24 09:17
刀刀 抵讚…夠坦白!吹水未輸過…真金白銀其實冇試過。




20. 引刀一快
2020-04-24 11:40
十一仔,有冇試過唔緊要,就算俾人話打更、開夜更的士、倒夜香,我都唔介意。
“全憑直覺、 未輸過…唔係未傷過、”,又要威,又要用頭盔掩飾傷勢,兩類人嘅表述啫。
頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。