人人讀書，我去搵工

　　星期日晚飯時見到一位剛大學畢業年輕朋友。佢話現在不少公司正在裁員，剛畢業的大學生搵工很艱難，所以，他早已申請繼續進修，亦已經有大學接受他讀MBA課程，現在等九月開學。

　　我對年輕朋友話，既然有大學接受你繼續進修，就應該去搵工。實話實說，MBA課程是畀一些有工作經驗的人去讀，並不是剛畢業的大學生，但疫情影響經濟，繼續讀書是沒有辦法的辦法。年輕朋友話我較早之前撰文，叫大家在疫情之下不要做三件事，其中一件是今年剛畢業的大學生不要去搵工，因為成功的機會率很低。結果令大學生很頹喪，現在叫佢去搵工，算不算是出爾反爾。

　　事情不能夠一本通書睇到老。昔日曹操親自帶兵攻打張繡，打打下知道許昌有危險，於是撤兵。張繡打算追撃，謀士賈詡話唔好，因為曹操必定會用精兵殿後，從後追撃一定會失敗。張繡唔信，結果畀曹操殿後精兵打個落花流水。張繡在追撃失敗後打算退兵。賈詡話應該再次從後追撃，張繡勉為其難再出兵，結果是取得大勝。張繡話唔明白箇中道理，賈詡話曹操突然退兵，一定會用精兵殿後，以防張繡追兵，但在撃退張繡追兵之後，就會將精兵調往前部，從速救援許昌，後部只剩一些老弱殘兵，所以不能夠抵擋張繡追兵。用兵是要根據形勢作出調整，否則，就不會成為一個出色將領。

　　我對年輕朋友話，今年一定會有很多大學生申請繼續進修，令到搵工的大學生質素大降。既然年輕朋友已經有大學收取，何不去嘗試搵工。雖然話疫情下不少公司正在炒人，但亦有不少公司騰籠換鳥，一面炒人一面請人，現在搵工的大學生受到的競爭反而會減少，道理與賈詡所講的差不多。如果搵到一份好工，就毋須急於繼續進修，在商場上所學的比MBA課程還要多得多，更何況不但不用交學費，而且仲有薪金攞，何樂而不為。