地產論壇
登入名稱
密碼
頁數:
晨早夜話(52)澳門可不可以成為金融中心
瀏覽人次:18781    回應:18
晨早夜話(52)澳門可不可以成為金融中心
 
湯文亮博士
紀惠集團行政總裁
2019年12月14日

  昨日有澳門老友吹雞,叫一班舊同學聚會,仲話訂咗聖誕盤菜,我話冇問題,今年與往年不同,年尾流流都冇應酬,與老友吹聚會就最好,司機話現在有了港珠澳大橋,去澳門非常方便,不過好似習主席要去澳門,安檢非常嚴謹,一定要帶埋回鄉卡,可能要過珠海關,我話冇問題,回鄉卡隨身。

  去到澳門私房菜,見到老友鬼殺咁嘈,佢話聖誕盤菜不夠正宗,問我知不知道缺少了那幾種材料,我當然知道,一般人唔會相信,澳門聖誕盤菜應該有臘腸臘鴨以及炸豬皮,沒有這幾樣不能夠叫澳門聖誕盤菜,不過味道唔錯。

  話題就是澳門是否能夠取代香港成為金融中心,如果國家要打造,一定可以,大家以為唔好以為澳門人好開心,其實是非常擔心,因為如果成為金融中心之後,有可能唔准開賭,亦符合國策,我話少擔心,如果澳門可以做金融中心,代表上海深圳唔可以,即是自打嘴巴,要成為金融中心,硬件是容易,軟件才困難,人材也是硬件,市民質素才是軟件,澳門人自己知自己事,管理賭場,發展旅遊業比香港優勝,但金融就不行,而且做金融中心還要有一個先決條件,就是可以抵擋外國的金融攻擊,令其不影響國內經濟運作,所以,我認為習主席即使有心送一份禮物給澳門,澳門人都只想心領。

晨早夜話(52)澳門可不可以成為金融中心
1. 十郎
2019-12-14 10:49

      放心啦 , 要咁多金融中心開飯咩。

2. 十郎
2019-12-14 10:57


      做好一瓣就得啦 , 記唔記得佳寧公司呀 ? 連殺蟲公司都撈埋 , 結果唔尊一, 後果累人累物。

3. Stephen Wong
2019-12-14 11:03
風水輪流轉,澳門由一個小賭城,發財立品,發展成為與華爾街並肩的金融中心.
香港就慢慢,由四小龍變成一處天天講政治當飯食,只謀小確幸的小鎮,為左糊口,
輪落到開賭為生.
4. Fisherman
2019-12-14 12:54
澳門有中心,
香港無中心。
5. 龍虎豹
2019-12-14 13:26
如果國家要打做,一定可以,……

打(造)
6. Admin 2
2019-12-14 15:06
To: 5. 龍虎豹

謝謝, 已修改
7. 十一哥
2019-12-14 16:55
一向話阿爺力大冇窮、離地一寸都撈得住、衹在肯唔肯…冇話得唔得、唔好估~衹要信、唔係迷信、千因萬果....始終建基於實力蓄藏、由大建高速…再進到高鐵、唔主力信用咭....而聚焦於微支付、未夠力時就忍忍…冚唔住就敢搏拳、在在顯示阿爺策略縱深…高瞻遠矚。
8. 引刀一快
2019-12-15 11:58
一定可以!只要將深滬兩市直接搬過去就得啦,呢勻澳門發喇。
9. 自我陶醉
2019-12-15 17:43
引刀兄

乜連你都同衰十一癲呀? 咁易做金融中心,上海一早做咗啦,幾時輪到澳門呀? 我聽落都係同P2P, 區塊鏈條橋差唔多啫。
10. 引刀一快
2019-12-16 01:13
自我陶醉兄

我講真話反話,你應該知道喇。
如果大大真係將滬市搬去澳門,我保證澳門日日發生離奇怪案。
不過,港交所話收購倫交所,收購之後遷去澳門,又唔出奇喎,然後放喺橫琴飛地,咁就真係fit ..........如果外匯儲備多三萬億的話。
11. 自我陶醉
2019-12-16 08:04
引刀兄

就係囉! 我都奇怪點解你會去咗衰十一個水平! 

至於收購倫交所,一聽就知道唔會有行,根本就唔係錢嘅問題! 如果搞到全球股市都A股化,到時真係要退休嘞。 哈哈哈!
12. 十一哥
2019-12-16 09:24
醉婆 有自知之明…點可能係十一哥嘅水平…

13. 真真薯片
2019-12-16 09:54
要做國際金融中心,最重要有一班國際金融客仔,佢地唔黎,你做乜都冇用

國際金融客仔要求行普通法+鬼佬法官,有金融糾紛可以用法律解決,有需要時可以將正苦告上法庭,而正苦係會輸官司賠錢,澳門得唔得?

靠阿爺獨力去搞,果個係中國金融中心,唔係國際金融中心,匯唔到美金,最多用昆倫銀行匯人民幣去一帶一路國家
14. 十郎
2019-12-16 10:19


      片兄 , 我孤陋寡聞 , 未聽過昆倫銀行 , 係唔係昆人銀行 ?

15. 金融糾紛
2019-12-16 13:19
咪住先,想賺阿爺錢,要普通法加鬼佬法官?瞓醒未?
16. 引刀一快
2019-12-16 23:24
自我陶醉兄

一直都係出口術啫,閒話一句,咁就獎勵咗瓊瓊好多億。
賣倫交唯一可能,就係英國早就準備定個分身,只要價錢吸引,買到香港傾家蕩產,呢頭交貨,果頭新鋪開張,俾個空殼加哥威吓,正係一石二鳥。

17. 引刀一快
2019-12-16 23:29
十郎兄

全名係昆侖佐里銀行。
18. 引刀一快
2019-12-16 23:34
真真薯片兄

鬼佬好多種,以前澳門都係葡國人揸嗮喇,唔係鬼佬就得嘅,依家大陸啲友仔,唔知頭唔知路,日日抨擊香港用鬼佬。
頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。