地產論壇
登入名稱
密碼
頁數:
一分鐘賺一千萬的悲慘故事
瀏覽人次:16545    回應:11
一分鐘賺一千萬的悲慘故事
 
湯文亮博士
紀惠集團行政總裁
2019年12月10日

  在我未寫文章之前,有老友睇到這條題目問我係咪哂命,我話唔係,上星期我睇到周顯兄一篇文章話10秒賺30萬,於是我又想分享我曾經試過一分鐘賺一千萬,好彩我冇賺,否則是一個悲慘故事,或者我唔會講出來,周顯兄10秒賺30萬之後,立刻起程去日本大飲大食一番,而且仲唔貴唔食,我知道可以一分鐘賺一千萬之後,決定獎勵自己,將午餐燒鵝飯改為鵝髀飯,我都覺得自己好蠢。

  廢話少說,十幾年前CY還未做特首,依然在地產測量師界搵食的時候,他的同事到公司介紹在一個由英國業主持有的香港甲廈頂層,是一層不是一個單位,當日我不在公司,我家姐接見他們,知道業主要價一億,立刻表示沒有問題,叫CY同事立刻做臨時合約,嚇到CY同事以為開錯價,表示要再做調查,不能即時做合約,被我家姐鬧了一餐,當我回公司知道整件事之後,立刻打電話給CY,佢表示價錢已經達到業主要求,而他亦覺得是市價,英國業主亦同意出售,不過為了公平起見,他打算做招標,底價不是一億元,而是九千五萬,我覺得很合理,當日是星期二,星期五開標,我話入標冇問題,不過要有條件,入標的公司最多可以派兩個人睇開標,而且當中標價超過底價之後,業主一定要賣,更加不能要求賣家加價,CY話合理,於是我要考慮出價

  我同家姐講打算出九千八萬,她有多少不明白,她已經出價一億,業主仍然唔肯賣,現在九千八萬又如何可以買到,這就是問題的關鍵所在,如果我們出價一億另加二千萬,即使買得到,CY同事就會領功話好彩當時沒有接受我家姐的出價,英國業主就算可以賣更高價錢都唔會開心,他認為CY沒有盡力幫他,如果出價九千八萬而又可以買到的話,CY可以同英國業主講我們當時的出價已經最高,在職業道德上可以交足功課,我家姐當然明白。

  開標當日,業主專程由英國來港,除了我們之外,其他幾支標都是略高於底價,只需要一分鐘就完成交易,當我離開會議室的時候,外面等候的同事話有買家加價一千萬買我們剛剛買入的樓層,我話不能夠,如果我即賺一千萬,CY就一定會被英國業主鬧,最低限度都會話佢沒有職業操守,好彩我冇賣,那個物業我們收了十幾年租,現值六億,如果我一分鐘賺一千萬,這一定是一個相當悲慘的故事。

一分鐘賺一千萬的悲慘故事
1. 十一哥
2019-12-10 14:18
呢條大C古O精怪、專業係來手、鋪哂網先敲鑼…信佢就不如過大海、10秒執30個..賭…算乜嘢一回事。

2. 引刀一快
2019-12-10 14:51
有個問題唔明,俾高1000萬賣係“沒有職業操守”,俾高1000都唔賣,咪仲緊要?
俾價嘅,可能係業主嘅人喎。
3. 業主嘅人
2019-12-10 14:53
業主根本唔知家姐出過一億。
4. 收藏
2019-12-10 15:09
多謝湯博士的分享,值得慢慢一看再看,己收藏文章。
5. Ben
2019-12-10 17:28
值得一睇再睇的故事
6. 十一哥
2019-12-10 18:01
賣唔賣…買唔買…心大心细,睇完呢個故事…结論∽有銀長揸磚頭冇得輸!
7. O
2019-12-10 19:24
個人領悟係, 長揸銀紙必輸。 希望果位賣樓業主只係換左第二間港樓,冇轉手換左英鎊買左英國樓。
8. 龍虎豹
2019-12-10 23:18
面等候的同事話有買家加價一千萬買我們剛剛買入的樓層,我話不能夠,如果我即賺一千萬,CY就一定會被英國業主鬧,最低限度都會話佢沒有職業操守,好彩我冇買,那個物業我們收了十幾年租,現值六億,如果我一分鐘賺一千萬,這一定是一個相當悲慘的故事。

好彩我冇(賣)?
9. 人生
2019-12-10 23:51

其實九七年至零三年。中央唔係唔救香港。而係佢想用低價逼走英資及外資。從而用大量中資控制香港嘅經濟命脈。而家亦都係 由於出現暴亂 好多外資不能控制 及佢哋嘅員工亦不能控制。所以中央亦都唔會再救香港經濟。所以佢亦會慢慢來逼走唔聽話嘅企業。控制全香港公司。要全面控制香港所有。但由於驚樓市直落會好傷。所以樓市會慢慢落。經濟又會一路落 直至中央全面可以控制全港大型企業及員工。中央先至出手救經濟

10. Admin
2019-12-11 09:12
謝謝8樓指正, 文章已修改。
11. M
2019-12-11 10:51
非常好的人士價值觀,長知識,食四方飯的生意大格應該如此,時下那些急攻近利中介代理及新二代的財俊應該學習
頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。