地產論壇
登入名稱
密碼
頁數:
有錢買英國樓,冇錢買馬拉樓
瀏覽人次:22072    回應:21

有錢買英國樓,冇錢買馬拉樓

 

湯文亮博士

紀惠集團行政總裁
2019年11月17日

  社會運動已經持續超過五個月,而且愈玩愈激烈,令到本來沒有打算移民的人都不得不再考慮。好彩大多數香港人還有多少錢銀傍身,就算未能即時移民,最低限度都可以在外地買一兩個單位以備不時之需,或者可能會損失一些機會成本,但當作買個保險,得個安心。

  有一個家境非常好的老友打算在美國紐約曼哈頓買樓,佢話曼克頓與香港很相似,大家都是金融中心,有各種不同種族的人以及食物。我覺得不妥,在外地買樓除了考慮生活環境之外,還要考慮政治風險。美國眾議院已經一致通過「香港民主及人權法案」,現等待參議院通過,特朗普簽署後便可以成為法律,對香港實施長臂管治,隨時可以凍結甚至沒收觸犯民權法的香港人在美國資產。雖然有人話該民權法在參議院排第238項辯論,隨時在特朗普任期完結仍未可以辯論,實在不用擔心。其實唔擔心就假,如果美國有心通過該項民權法,幾個工作日就可以。君子不立危牆下,如果在曼克頓買樓,不如去英國倫敦買。講條件曼克頓與倫敦差不多,最低限度政治風險不大,況且英國在通過脫歐,英鎊下瀉後,樓價已經下跌了不少,現在買還算是執平貨。老實說,雖然我在曼克頓有樓,但亦打算在倫敦買多一兩個單位,理由是飛行時間短一些。年紀大了,坐長途機很辛苦。

  公司有同事話買唔起英國樓,在亞洲區有什麼地方好買。首選當然在大灣區買,但很多人不願意,他們認為買大灣區同買香港樓沒有分別,失去了保險的功能。他們希望在其他國家買樓,新加坡當然是首選。不過新加坡不但樓價貴,而且生活水平很高,不如去倫敦買樓。除了新加坡之外,作為移民甚至退休,我認為可以考慮馬來西亞,一般人以吉隆坡為首選,但我認為檳城或者比較好一些。檳城粵語通行,飲食習慣亦差不多,樓價亦相當合理,可以作為第二家園。但檳城不適合年紀太輕的人,因為工作的機會不多,以退休心態還可以。無論如何都是在家千日好,最好唔使我移民或者去第二家園居住

有錢買英國樓,冇錢買馬拉樓
1. 引刀一快
2019-11-17 12:32
有錢沒錢,大灣買先。

香港事件,算係對香港人上緊寶貴嘅一課,觀念改變最不容易,大家應該知道往後嘅路,可以點行。


2. 龍虎豹
2019-11-17 12:38
講條件曼克頓與倫敦差不多,最低限度政治風險了大,

不大?
3. Stephen Wong
2019-11-17 13:32
死火啦!湯先生都轉軚.
4. 鳥5
2019-11-17 13:43
四五個月前, 我話大陸有23條輻射香港嘅預案。。。 今日 大家唔會覺得匪夷所思呢? 中央對港第二任務, 就係對付土地持有人。 呢個就係佢哋覺得 ,長治久安嘅觀點。。。 房屋問題實在太過離地。 不過論經濟硬著陸。 我同條數去睇 橫睇掂睇 都係出年呢個timing。 最差嘅未到。 宇宙實力平衡。。
5. Admin
2019-11-17 13:45
謝謝2樓指正,文章已修改。
6. 鳥5
2019-11-17 13:49
今日再同大家講。。。 撤退辣椒 ,其實只會令樓價加速向下。。 呢個就出年先同大家再講 ,留番下年繼續做我嘅估神
7. 鳥5
2019-11-17 14:01
資產保護.. 其實應該揀啲liquid.. currency.. 李昭就係一個醒目仔... 現金流高 價格反應 prime 壞消息... 畢竟不動產 冇腳走好難逃
8. 十郎
2019-11-17 14:26


      冇錢不如買馬拉糕 , 馬拉糕可能還比較 “ 穩陣 ”。

9. 十一哥
2019-11-17 14:50
雀仔  唔好咁驚啦…打橫打掂都有糊食…跟到節拍怕乜 ?

10. 撤辣
2019-11-17 14:55
可以先撤除15%買家印花稅,吸引多啲大陸投資者來香港撈底。香港今明兩年仍然會是全球IPO上市冠軍。
11. 鳥5
2019-11-17 16:02
11 哥, 我自少訓練, 投機執錢,膽生毛, 情緒不嬲有自我訓練。。。 大賭就唔搏。 滑浪板 衝大浪上落。。 可以的。 出戰艦all in 而家就未係時候.. 計到數我就會通下水
12. 十一哥
2019-11-17 16:13
呢幾十年…最茅係邊幾個國家 ?  諗真D啦!個馬拉老人精一當選持老發茅、美帝直情茅到冇洗遮掩、全因阿爺今時唔同往日…先至令斑茅冇可施其技咋  !  驚就早D散水…收買佬等緊回收呀!

13. 十一哥
2019-11-17 16:39
班前朝魚業身在香港始終忠於契媽、從來冇一個真心認祖、今日個局以為可以玩到阿爺發茅拆自己舖頭、點知阿爺順水推舟…由得魚業拆檔孭罪命、借機舊舖重組新裝修、、好過跟人品味修修補補…日日抝撓映響形象。

14. 望東樓
2019-11-17 16:40
小刀,請教大灣置業係稅務、隱藏成本方面有乜嘢需要考慮?
15. 十一哥
2019-11-17 21:56
全世界都有風雨、隔離飯香人之常情、唔好以為四圍買磚頭好過癮…煩到冇朋友、D專業收費冇價講、淨肉剩唔到幾両肉、尤其租客權益領過嘢就知、除非丟空唔志在…不過溫哥華就為皮好重、偷鷄正苦未必捉到…但有銀去偷鷄又何苦呢?
如果真係咁灰又唔怕煩、就不如去大灣…比刀刀賺多少好過。


16. maymay
2019-11-17 23:29
想請教湯博士: 買唔起London 樓,買Manchester 樓點睇?
17. 引刀一快
2019-11-17 23:44
東樓兄

講緊新樓、樓花定二手?

稅務最好問當地地代,全國統一稅制係理論上,各個地方有多少唔同,最近聞說連豪宅稅都撤咗,至於隱藏成本,要睇你買邊度,做唔做按揭,一般嚟講,正規買賣,地代對細節都好清晰,我以前大行細行都幫襯過,只要地代唔係蛇頭鼠眼,問題唔大,你可以先揾大行傾偈,問佢攞個稅務列表,另外,一定要求賣方去銀行做交易信託,國家規定係銀行免費服務,不過一般都會有相關費用三兩千,有交易信託會少好多風險。
另外,睇樓時先問清楚業主有冇抵押,係咪房產證本人簽約。
18. 十一哥
2019-11-18 09:14
多D人返大灣、刀刀揸緊機會…輪迴返歸有望啦!

19. 望東樓
2019-11-18 09:31
絕對同意樓上十五樓所講,萬事小心、三思。
20. 十一哥
2019-11-18 10:13
人生有幾多個十年,黃金果幾十年…頻頻撲撲…走東閃西,又冇犯法…硬係就似着草…為乜?認清已擁有嘅…係唔係咁不堪?免得成日學人身郁郁…攪到冇碇求一宿。
頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。