一,常言道,don’t make stupid people famous 。雖然有讀者要求講張華鋒,但其實我唔想。明眼人都知其實佢都係出來搞下氣氛。見到大家都識笑,咁咪幾好囉;雖然苦笑,但都係笑吖。我都唔鍾意笑人嘅;咁 mean,唔係我風格囉。
二,講返制度。成個廣義嘅金融業界,立法會裡面,最少有三個代表,分別係「金融」、「金融服務」同「保險」。我夠膽講,就算日日中環出入嘅朋友,都未必識分呢三個界別係乜。其實「金融」係銀行,「金融服務」係證券,「保險」咪就係保險囉。當然,呢三個功能組別全部都係「團體票」,即係公司票,所以對大多數從業員來講,呢三個界別嘅代表,確實冇乜認受性,唔識一啲都唔出奇。
四,無獨有偶,呢幾個界別分別有近乎獨立於政府行政機關嘅監管系統:金融由金管局睇,證券有證監,保險都有保監。幾個功能組別議員嘅出現,好大程度都係當年業界 lobby 出來嘅結果,叫做有個代表同大台刁下。當然,業界同監管機構其實都有溝通同默契,好多所謂嘅規矩,都係一早夾好。
五,話雖如此,證券業同證監嘅關係就認真嘛嘛地。點解呢?嗱,呢種高層次少少嘅問題,我就有興趣喇。
六,首先要明白,除咗以上講嘅三個「廣義金融業界」,好多有自我監管嘅行業或專業,都會有個功能組別代表,例如會計法律。所謂監管,銀仔另一面其實就係 Cartel ,呢個道理相信大家都明。當業界響立法會有個議席,就代表有票可以交換可以同政府做場戲;呢個亦係點解香港係一個「尋租型經濟」。
七,銀行係百業之母,大家都識講。從前,銀行就銀行,保險就保險,證券就證券。不過,銀行相對另外兩個行業,有兩大優勢:資金成本低同埋零售客戶層面更廣。唔單止香港,全世界嘅銀行都踩過界做埋證券同保險。
八,假如我話銀行業先係香港最大尋租者,真係不失為過。好多人眼中,因為地產財團最 visible,所以成日「地產霸權」咁講。我唔否認,衣食住行甚至電訊同其他公共事業,都有地產財團嘅指模,不過大家都唔好忽視銀行業嘅足跡。買樓都要做按揭啦,係咪?你買層樓,當中有幾多係地價?計埋樓按利息,其實邊個賺最多?成個經濟食物鏈,最上層一定係政府,然後就係銀行。
九,講返「廣義金融業」,證券同保險,相對銀行業,其實競爭比較大,結構亦都比較複雜,過去廿幾年亦經歷比較大嘅轉變。
十,保險業,不但好彩有強迫金幫補下,政府又推咩自願醫保,雖然唔係話超賺錢,但都叫有生意做下。另外,過去十年八載,香港保險公司做唔少大陸保單,大家心照咩事啦。
十一,證券業,我覺得過去十年,其實係寒冬;雖然每日交投都有好幾百億,但有幾多真係零售客吖。今時今日證券業最主要嘅收入,亦已經唔再係客仔佣金。咁證券行點維生呢?有啲做財富管理、資產管理。亦有證券行幫人投資移民,做埋 proof of funds。又有啲證券行諗做 program trade 之類。不過,賺埋都唔夠交冷氣費。有啲直頭轉營,早過一帶一路走去東南亞做融資同投資。
十二,不過,講到尾近年證券行最主要嘅生意都係 corp fi 同借錢。所謂 corp fi,講出來好聽,但其實咪又係將啲狗屎垃圾包埋一舊推上板。資金咁泛濫嘅環境,要資金,又駛乜上市?上市為乜?真係為集資咩。心照啦。所以,證券業又係「廣義金融業」裡面,出最多蠱惑嘅一門。
十三,戴頭盔先。有蠱惑,唔代表監管機構係唯一答案。監管機構唔可以隻眼開隻眼閉,我明。但係為做而做嘅事,好多時又殺錯良民(假如呢個業界有良民嘅話)。我嘅觀察係,過去好多年,證監做嘅嘢,都係殺錯良民居多;甚至專殺良民。
十四,點解?響灰色地帶搵食嘅人,一定會睇清睇楚制度,搵啲唔容易堵塞嘅漏洞,否則好難長久咁搵錢。當然,呢個亦都係業界代表發揮佢協調功能嘅時候。不過坦白講,業界代表可能真係得到部份人信任,但同證監周旋呢,就似乎唔夠能量。點解呢?真係唔可以忽略人嘅因素;西環信得過,唔代表對監管機構勇武。話說肥老闆上次都面臨挑戰,叫做險勝啦。
十五,香港金融業,有人以為最開放嘅環節,係證券業。少年,你太年青了。港交所一所獨大,呢個係萬惡之源。大家記唔記得綠色通道事件?又記唔記得港交所同證監就上市審批曾經角力?香港證券業嘅黑氣,竟然係來自一個裝修富麗堂煌嘅交易所。
十六,曾經我同某位都幾開明嘅前財金官員討論港交所獨大,佢話:「香港從來都冇法例話唔畀有第二個交易所喎。」「咪玩啦,點申請呀?」最後,討論不了了之。過多幾年,嘿,有個叫張震遠嘅人,又真係整個商交所。之後嘅事,大家都知,不多講。
十七,香港國際金融中心地位穩如泰山?大家都擔心法治受威脅,亦有少數人明白聯繫匯率畀香港最大嘅資金深度。不過,真正被忽略嘅係,香港金融業個種權力同利益嘅勾結,以及權力同利益高度集中帶來嘅風險;包括不思進取嘅風險。
十八,坦白講,我唔怕深圳競爭,我最怕係無競爭,又或者啲假到無倫嘅假競爭。至於咩 Fin Tech,Insure Tech,笑死人咩。真正 Disruptive 嘅創新,唔會響香港出現,就算出現都唔會被 Adopt。講完。