地產博客 > 絲絲細語 返回
瀏覽人次:21394    回應:0
絲絲細語

退休人士變家廚

 

左丁山

2021年4月19日

  定期飯局常客之一,老友S,自有新冠肺炎以來已成為稀客,一年多以來,飯局不時受限聚令影響而暫停,但即使恢復四人一枱之後,老友S都好少參加,理由非常簡單,就係退休人士,小心補養為上,健康第一,便盡量減少出街,更絕少與朋友吃飯,年多以來,訓練自己成為家庭廚師,為妻女煮飯。十幾個月冇見佢,左丁山唔抵得,卒之要單對單約佢食飯,佢肯應承噃,但要左丁山到佢屋企食便飯,唔肯移玉步到酒店。

  請朋友回家吃飯,並非香港常態,最主要理由係香港人居住單位嘅平均面積可能係全亞洲最細,與歐美更加冇得比,請客回家又要花時間煮飯燒菜與清洗碗碟,不如大家到餐廳啦。老友S話要到佢屋企食飯,令左丁山回憶起,上一次到朋友家吃飯係邊一年邊一個月呢?都唔記得清楚咯,應該係新亞書院師兄張總未退休去上海定居之前,邀請幾位校友到Century Tower半山圓形豪宅大廈,吃他入廚炮製嘅拿手菜式,張總係美食專家,唔只識得食,仲係超一流家廚,張太從來唔會在家入廚,只係負責洗碗碟,係一件好辛苦嘅工作嚟嘅,因為張總在家宴客,十足高端餐廳格局,不停更換碗碟,太太睇見就對左丁山講:「難為了阿嫂!」點解冇工人洗?享受美食讚嘆張總廚藝之餘,了解到張總收藏了不少珍貴印章擺放在家供朋友欣賞,又驚外傭不小心,故此不請家傭。既然如此,張總每次請朋友回家吃飯,要問過太太肯唔肯洗碗先!

  張總當年有銀行租屋在Century Tower畀佢住,氣派自是不同。此日來到老友S住宅單位,係標準香港高級中產格局,建築面積千四呎,時值四千幾五千萬,裝修一流,原來老友S嘅二千金係室內設計師,唔怪得間隔係十分講究,如果計埋住宅時價,香港嘅億元富翁應該數以萬計,但現實啲講,如果只係得一層樓自住,即使供完按揭,仍然只係有stock(存貨),冇現金流(cashflow),好睇唔好食,住宅價值鎖死咗吖嗎!故此美國新英倫地區的有屋人士退休之後就賣屋,搬去南部過退休生活,加州退休人士會考慮賣屋搬去阿里桑拿,原因就係先賣洛杉磯住宅,再到Tucson買大屋之後,還有可觀現金供退休之用。可惜吖,香港人依家願唔願意賣咗天后廟道住宅,搬去中山,珠海呢?相信更多中產係似劉細良賣樓變現移民加拿大,孰令致之?

 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼