地產博客 > 樓市散打王 返回
瀏覽人次:29426    回應:12
樓市散打王

終極辣招

 

方卓如

2018年3月6日 (信報)

《財政預算案》冇乜好講,反而預算案記者會值得講。司長話會睇睇發展商點賣樓,留意到有發展商只係推一兩間單位招標,呢種賣樓手法引起關注。司長咁講,小心最強辣招出籠。發展商有樓唔賣,唔係嫌錢腥,剛剛相反,就係想賺盡。唧牙膏式賣樓先可以盡吸購買力,讓買家無可選擇,沒有仔細思考空間,有買趁手。

人最大嘅困惑,出現於有選擇嘅時候。有選擇,你會期望再好嘅選擇,就會放棄眼前揀唔落手嘅垃圾。冇得揀,垃圾都要放入口,幾貴都要買。

樓價愈跌愈難上車

賣樓惜售,賣唔晒留為貨尾,先可以維持而家嘅市價。如果發展商一口氣要賣晒先收手,減價清倉,樓價點會唔向下。正如股票一樣,斬倉沽貨,價錢點會唔跌?

如果政府連發展商點賣樓都管埋,令佢哋喪失定價權,樓價就有下跌壓力。政府要管賣樓方法唔係冇可能,新加坡就係咁做。外國發展商起樓,限期內要賣,否則要罰。政府只要在賣地條款,甚至喺售賣樓花同意書列明,幾時要全部賣晒,否則要徵稅,呢項就係最終辣招。

新加坡用呢招遏抑樓價非常成功,樓價的確一沉不起。如果政府以樓價下跌為己任,出此辣招,保證樓價下跌,但係平民百姓一樣買唔到樓。點解?

因為升緊嘅樓有人追,跌緊嘅樓冇人敢買,樓價下跌,銀行更加做唔足價。向下嘅樓市,銀行唔敢借足,自動扣減按揭成數。樓價向下,借二按嘅更高危,隨時負資產。樓價向下唔會令市民更易置業,相反更加令人買唔到樓。前輩話望自己發達都唔好望樓價跌,今時今日更加適用,只係今時今日要發達更加難。

預算案唔會講辣招,唔係場合,但係記招講咗政府有諗計。以前辣招冇一招可以推低樓價,市民唔開心。慎防最後一招真係可以推低樓價,到時你更加唔開心。

 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼
1. 十郎 2018-03-07 08:18:40


      樓價愈跌愈難上車 ? 這一論點要有待驗證。市民難買樓可以唔買 , 但唔可以冇樓住 , 即係要租喇 , 樓價升直接影響租值上升 , 那麼樓價跌是否一樣令租金下調 ? 這是個民生問題 , 要看政府為民生定係為庫房考慮 ? 亦是競爭力問題 , 再這樣升升升 , 150元一碗雲吞麵隨時都有得食。

      結論是推低樓價非為容易上車 , 係舒解民困問題。


2. 回1樓 2018-03-07 08:32:15
推低樓價舒民困?

你火星來的?不如回到小漁村?咁就全民富裕?再不然變成北韓?
3. 巴 2018-03-07 08:57:12
同意呢招唔錯

至於樓價跌 市民上唔到車呢個推論,

唔知係2003年是否冇任何買賣反映返呢

心水清知咩事

70萬一間屋,5%首期,唔使3.5萬上車


4. 回1樓 x2 2018-03-07 08:58:15
樓價升直接影響租值上升 ????

不一定哦。
5. 巴 2018-03-07 08:59:10
唔好以為揸住支筆就當其他人唔識字
6. 回1樓 x3 2018-03-07 09:18:41

私樓租金回報創歷史新低 大單位跌穿2厘


樓價急升,租金升勢永不及樓價走勢,導致租金回報跌至史上低位,其中,大單位回報更首次跌穿2厘。

差餉物業估價署資料顯示,實用面積1,722方呎或以上大單位,截至1月底租金回報率按月下跌0.1個百分點,跌至僅1.9厘,是五類戶型有統計以來,首個跌穿2厘關口的戶型。


7. 十郎 2018-03-07 09:55:25


      AA

      租金回報歷史新低 , 解決方法一是租金要上漲 , 方法二是樓價要下跌。租金回報新低 , 這樣是否反映左樓價太高呢 ?

      租金升 , 跟著來的是樓價升 , 樓價升左 , 租金回報又新低 , 這種狗追狗尾式的追逐 , 通漲就升 , 利息跟升 , 競爭力下降 , 必矣 ! 政府要做什麼 , 無法預測 , 推升定推低 , 心中有數的。

      我無視蠢人同蠢問題 , 唯獨你特別蠢 , 所以表達下意見。

8. 回7樓 2018-03-07 10:30:10
真正蠢人係面對十幾年升勢而後知後覺、搞到依家幻想政府推冧樓市而全民皆富,然後有不同觀點者便是AA.夠蠢嗎?
9. 回7樓 2018-03-07 10:42:23
我是6樓,我不是AA,我看完你文字,不認同樓價升就會帶動租金升,又剛睇到東方,所以轉發,我是獨立的留言,不要見笑。
10. 十郎 2018-03-07 10:49:59


      9 樓--------對不起 !  我見你留字大大隻 , 所以誤會 , 我其實真係唔回應的 , 見到租金回報新低的誤解 , 忍唔住手。


11. 孟波 2018-03-07 11:50:06
AA最緊要有買賣做有單開,理得佢樓價同租金升定跌,總之要易成交,個勢易叫買家高追就吹升,現在二手盤源少業主心雄,就搏命選擇性出D破紀錄成交新聞來誤導買家,唔畀破紀錄價係買唔到野。

到買家冇承接能力或企硬時,就吹跌向業主鋤價務求做成買賣,升市跌市都唔係問題,最緊要有單開。
12. 天水圍林太 2018-05-16 13:46:11

麵粉唔再用嚟整麵包

2018年05月16日

方如玉帥:啟德地王由新地以251億元投得,成為地王。其實,如果唔係計錯數,第二地王,長沙灣興華街西都應該係新地投得。記得當年新地對住鏡頭回應記者提問,有關海航連環高價投得啟德地皮,係佢哋話要等啲癲價投晒先。言猶在耳,今日,新地用更癲價投地。證明內地發展商參與,打破了本地發展商心理相通地用本地價投標,即時將土地真正價格釋放出嚟。

點解本地發展商肯陪內地發展商用癲價投地?因為佢哋有本事用更癲嘅價錢賣出去,穩賺不賠。新地8年前都投了一幅百億元地王,位置在佛光街同忠孝街交界,樓面地價每方呎1.25萬元。那地方,隔籬是愛民邨。直線思考的你,在公屋旁邊,每方呎1.25萬元地價,相信你一心諗住將會有個太古城式中產樓盤。7年後,樓盤開賣,先唔講樓價,車位是近500萬一個,樓盤自然是一等一豪宅,呎價超過3萬的天鑄。發展商有本事在任何地方起一個豪宅給你,怕什麼癲價投地?地皮會有地域價錢,但樓盤價錢已不問地域,不論大細,通通豪宅價。

同年有另一幅百億元地皮,是山頂真正豪宅地段,呎價3.2萬元。今天地皮變成MOUNT NICHOLSON,呎價全港分層住宅最貴,10萬蚊呎,但計落都未必夠天鑄好賺。

麵粉價錢不斷提高,因為發展商唔再用麵粉整麵包,全部整結婚蛋糕,價錢賣高好多。本來市民只係想食個麵包頂肚,有瓦遮頭就心滿意足,但發展商唔會咁簡單,要你食蛋糕,全部有會所、泳池、健身室,管理費足以請多個工人姐姐。以前出現麵包平過麵粉,但你永遠唔會見到蛋糕平過麵粉。

未來你唔會見到樓價跌,而且習主席還親自批准香港要發展科技,未來大量科技人才來港。要知道,科技人是現在最有錢嘅一群。

矽谷嘅樓價全美最貴,連紐約都要樓價下跌,加州開始思考應否租管。科技人才來港,唔買樓都租樓。咁多有錢人嚟香港,你覺得蛋糕會平?