借地不是捐地

　　香港自去年六月发生反送中修例运动之后，社会撕裂，黄色蓝色互斗不休，林郑政府断错症下错药，以为年轻人上街系因为冇钱买楼，轮唔到公屋，心内怨愤之故，於是放宽八百万元以上楼宇之按揭上限，最高可借钱九成，同时又向地产商施压，强力游说捐地兴建过渡性房屋。地产商心领神会，於是拥有农地甚多之新世界、恒基、会德丰及新鸿基先后宣布捐地，合共加埋可提供起码一万伙过渡房屋，各大地产商之中，唯独是长实冇乜动静，於是一啲蓝丝又有嘢讲，诸多意见，要长实表态。

　　所谓社会责任，各有不同诠释，长实集团素来透过私人拥有之李嘉诚基金会做善事，历年捐款过百亿元，系本港富豪家族之冠，近月为咗帮助受重大打击嘅餐饮业，喳一声就派钱十亿元，派钱速度之快，手续之简单，前所未见，餐饮界人人赞好，又唔见其他地产商跟风？有农地就捐地，有银纸就捐现金，各自表述，岂不更合乎自由选择原则？

　　前日在德辅道中行街，碰到测量师C。2000年新年前佢离开大公司，自立门户做老板，对香港地产市道继续睇好（呢个时候创业，梗系要有乐观态度嘅），左丁山唔问佢生意如何嘞，只问佢一句：「你对地产商捐地有何睇法？」测量C立即纠正：「你讲捐地，系错嘅，报纸系咁讲捐地，亦系错嘅，捐地即是放弃晒对一幅土地之拥有权、使用权，送晒畀政府。但白纸黑字嘅事实就系地产商借地，不是捐地，恒基新鸿基等借地畀政府兴建过渡性房屋，皆有到期条款，一般系8年，即系话政府攞到幅农地，搞三通一平之后，兴建临时性房屋畀公屋轮候册上之人士搬入去居住，六至八年后，佢哋可以上楼入住公屋，免却在轮候期间，捱劏房贵租之苦，计划系好㗎，帮到有需要之人，但窍妙在8年之后，政府一定要能够有足够公屋，畀住在借地上过渡房屋居民可以上楼。」左丁山立即接住问：「到时唔够公屋，呢班居民上唔到楼咁又点？」测量C话：「你都谂到呀？到时如果上唔到楼，居民唔肯走，咪有强行拆迁罗，之不过，地产发展商够胆如期收回借地咩？」梗系唔敢啦！8年后收地虽有法理依据，但到时舆论会讲人情，唔讲合约精神嘅嘞！原来借地都有风险，然则利益何在？测量C骑骑笑：「到时生农地已变成熟地，拆咗过渡性房屋，可以立即起私楼，几妥当！」哦！拉阔啲画面睇，借地又几高招喎。