沙田陈太第四位孙女出生,叫左丁山午饭后行街行到IFC,顺便同佢买啲朱古力送畀亲戚。好易啫,行到一间法国式朱古力店,问有无XYZ,两年前买过好多嘅噃,点知女店员话冇XYZ产品,叫左丁山畀张XYZ样本相片佢睇吓。当堂窒咗条气,你估人人买完朱古力都会影相留念嘅咩。卒之冇帮衬就走人,心谂:「今时今日,咁嘅服务态度」,点在IFC竞争呀?
呢句话系边个讲嘅呢?谂咗一轮,先至记得番系刘德华嘅API广告。行多几步之后,畀人嗌住,原来系三十几年前嘅老友B嘅秘书,当时大家有刁一齐做,彼此秘书都认识,估唔到秘书B仲认得左丁山。当年二十零岁,今天已为人母,拖住一个四五岁细路行IFC,多口讲句:「秘书B,你个仔好靓仔噃。」秘书B话:「撞,我个孙呀!」大家为之失笑,想起当年秘书B最钟意听刘德华,问佢:「刘华好似开演唱会喎,你去唔去听。」秘书B当堂想喊咁款:「买唔到飞呀,左生我知你识好多人,帮我搵两张得唔得?」连忙耍手拧头,呢啲嘢咪搞我。秘书B又话:「华仔好冤枉呀!最近无端端畀人闹,人身攻击得好紧要,你知唔知呀?」系?真唔知喎!每日睇报纸咁多张,都唔多觉。秘书B讲:「你上网睇吓啦!」
日日都有上网,不过系睇CNN、BBC、CNBC、彭博,睇世界大事!香港网唔知有乜好睇呢?不过听完秘书B咁讲,好奇心油然而生,返到写字房上网搜寻吓「刘德华」,原来真系有好多网上攻击佢嘅新闻,势凶夹狼,侮辱性人身攻击都有。刘德华为「团结香港基金」之东大屿填海建议做「推广影片」作旁述,谈及填海之需要,照计冇乜大件事啫,左丁山在本栏也曾支持东大屿填海,想不到刘天王树大招风,有啲激进环保派闹到佢半死。乜刘德华唔可以做旁述咩?乜刘德华唔可以赞成填海咩?乜刘德华唔可以有言论自由咩?土地大辩论噃,你反对,我赞成,各说各话都唔得,香港一啲网民认真霸道!又有一啲评论员话,刘德华赞成填海变成建制派,此话相当危险,建制派中亦有反对填海嘅,因为填海造地会拖累地价楼价,伤及既得利益集团,一啲地产商都唔知几钟意环保派,认为佢哋系推高楼价嘅主力。一啲人往往同时称赞新加坡解决房屋问题有良方,一方面大骂特区政府比唔上新加坡,殊不知新加坡人口急增,解决方法就系大量填海!刘德华若为新加坡填海拍片作旁述,必受新加坡人欢迎啫。