有老友话我蠢到冇人有,现在买股票仍然睇市盈率,应该拥抱新经济,买股是讲概念,市盈率根本是废物,所以我做极都做唔得大,老实说,我有现在财富已经相当满足,人生於世,唔系只识得搵钱,但买股一定要睇市盈率,如果不以市盈率作为参考,乐观而言,所买股票是天价,有无穷上升空间,悲观来讲,没有收入,股票的价值是零,大家可以睇到汇丰宣布唔派息之后,股价跌超过一半就知道大家口中虽然话买股不用睇市盈率,但心中仍然非常著紧。
大家又千祈唔好以为买股票唔睇市盈率是新鲜事物,大约在20年前,科网股如日中天,当时大家不但唔睇市盈率,而且仲讲燃烧率,即是公司资金可以够几耐挥霍,当时有老友叫我投资那些公司,我话我是一个保守的人,明知所投资的资金是会被燃烧,点解仲要投资,而且,就算蚀晒,那个负责人仍然可以话完成终极任务,很辛苦将资金燃烧完毕,我是旧经济人,买楼收租算啦。
老友话有兴趣一个我的物业,叫我开个价,我开了一个天价,老友话有冇搞错,租金回报不足0.5%,我话奇怪,我以为老友唔睇租金回报,原来都有睇,咁都比较正常,如果买楼的人唔睇租金回报,我相信天下大乱,楼价升到唔知乜嘢情况。