安达臣地皮尺价是12000蚊一尺，留意入标嘅公司数量系破纪录，大家都想抢呢块地；
中标嘅并非最活跃、最大嘅地产商，表示任何发展商要攞地，就要出一个进取价钱，否则就会好似新地(0016)失落咗长沙湾兴华街幅地一样，计错数，搞到自己幢酒店孤零零。
而家唔止市民买楼要用进取价，发展商攞地都一样要进取价。以风险嚟讲，发展商唔低过升斗市民，唔够实力嘅发展商，买贵地嘅后果，仲惨过边缘市民借到尽勉强上车，你睇海航？而家楼价不停上升，发展商买贵地，市民买贵楼。咁多贵面粉响货仓，发展商都唔敢卖平面包。一日政府唔撤辣招，一日楼市都系由发展商一手主导。由发展商主导嘅楼市，系唔会跌。未来你会一面见楼价创新高，一面见到唔少银主盘，正如呢边高价投到安达臣地皮，另一边启德差唔多出现银主地一样。
近两年世界发展系突破性，突然间令人彷佛生存在另一个星球。资产价格直线上升、人工智能、加密货币，你可以感觉到，未来世界会完全唔同。有两套纪录片，一套叫Banking on Bitcoin，另一套系AlphaGo。
赢大钱靠信念 增胜算惟进取
Bitcoin纪录片唔止系找寻中本聪，仲讲咗Bitcoin发展途中，几多人因为行得太前太快，而家要坐监。你觉得Bitcoin由高位跌五成好惊？但系Bitcoin之前试过跌七成；你而家入市买Bitcoin未算最够胆，3年前够胆买Bitcoin嘅，佢哋真系买嘅未知前途嘅空气。唔好忘记，3年前就系拉咗两个Bitcoin foundation主持人嘅时候。当时美国政府嘅打压，比而家南韩政府高出不知几多倍。而家南韩人系主要买家？3年前美国人几乎系唯一买家。而家加密货币跌价，对相信这玩意嘅人，湿湿碎。投资同投机，赢大钱嘅永远系有信念嘅人，仲要系坚定嗰一只，知道自己买乜嘢。
AlphaGo更加系绝顶例子，当年李世乭系可以赢到人工智能，因为AlphaGo有弱点；而家罩门封上，人类再冇机会。未来人工智能会抢去好多人类机会，你要保持自己嘅胜算，就系要同投地一样，进取。
App下载
