恒生指数昨日收报28639点,升336点,成交1154亿。全年最得人惊嘅时刻终於在年尾出现。股楼都由年头升到年尾,估跌嘅赢面当然比较大,所以个个专家上电视都话小心睇住跌,但系边个听专家话买跌就输到甩裤。去到而家,更加多人话睇跌,但系你够唔够胆同全世界对着干?股市受北水影响,传统分析方法已经失灵,楼市又何尝唔系?你用伯爷嗰代嘅思维去分析楼市,惨过你300蚊放晒腾讯,400蚊唔敢再追。
传统豪宅地段,中半山、山顶、大坑道,呢啲地方应该楼价贵一截啩?错,以尺价计佢哋仲平过九龙新晋豪宅。油麻地顶层1575实尺卖1亿,呢个价钱买到2800实尺爱都连3个车位有找。唔通油麻地地段靓过中半山?买楼唔系话Location Location Location咩?点解有人肯用1亿买个景,都唔肯用同等价钱买Location?证明Location系英文,中文「位置」就唔同含意。唔系中环返工嘅,中半山位置一啲都唔好,又迫又吊脚,仲坐南向北,食正西北风。西九系运输重镇,将来仲系行国内法律,底气够,呢啲先系地利。
传统豪宅,你睇过嘅话,吓死你。楼底矮、大堂旧、会所残、车位冇盖,外墙可以维修,但30年水渠冇得搞。好多业主住千几二千尺,内栊同公屋冇分别,露台对住对面分体式冷气机。新晋豪宅,大堂已经搞到人哋台庆一样金碧辉煌,管理员企响酒店式柜台后面,变身礼宾员,朝朝乜生前乜太后,好不亲切。装修一律欧洲式,指定配件Miele 或者 Gaggenau,唔煮饭都可以当装饰品。最紧要系会所够靓,你买完层楼都冇乜钱剩,放假去会所做吓运动,夜晚煮吓饭仔又一日。况且室雅何需大,有部手机上网就天下我有,世界尽在我手。香港地咁细又塞车,南昌站搭车去ifc,可能仲快过你响MOUNT NICHOLSON司机车你经花园道落山。咁你话,你住location还是住真豪宅?
不过,Location另一个含意,系neighbourhood。而家300尺嘅劏房楼同3000尺嘅顶楼放响同一幢大厦卖,相同Location但不一样嘅neighbourhood。山顶是一种neighbourhood,西九是另一种。传统智慧买地段,今天嘅环境买邻居。要住,梗系住响啲可以问隔篱借盐,出入会讲声早晨,入电梯会等埋嘅邻舍旁边。
要控制楼价,其实好容易,我有绝桥。澳洲唔准外国人买二手楼,全部要买新楼,目的系唔想外国人买走啲现存精品,要佢哋通通俾当地发展商锯。香港要反转嚟行,应该唔准非本地出生人士买新楼,通通要佢哋买二手楼。这样,现行业主可以卖旧楼畀非本地出生人士,大赚一笔,够晒首期买新楼,仲可以享受发展商二按。有咗大批非本地出生嘅购买力,二手转旺,成交活跃,楼市自然唔会干升,发展商亦唔可以疯狂开价。到时楼价受控,市况活跃,香港人又可以upgrade住豪宅,绝对系一大政绩。只可惜政府首要服务嘅唔系本地出生人士,目标系将资源调配畀冇响香港长时间交税嘅人士享用,所以你只可以停留响伯爷年代嘅思维,等抽房协资助房屋。