买楼而没有升值嘅好处，同租楼冇分别

　　昨日圣马利诺MotoGP，系罗斯嘅主场，但系偏偏罗斯自己揸电单车整亲脚，要休息一个月，唔可以比赛，搞到成场比赛啲粉丝斋摇46黄旗，非常无瘾。电单车系危险活动，超级高手都会出意外，普通人更加唔可以掉以轻心。

　　首置上车盘未正式公布，恒地（00012 )即刻有反应，股价创新高。种种迹象显示，首置上车盘唔止益中产，仲益埋地产商。地皮唔会同公营房屋争，最现实系公私营合作，让地产商低价甚至毋须补地价，发展手上地皮。

　　有补地价优惠，发展商可以起更多楼，卖畀政府指定业主。如果系首置同私楼混合盘，发展商可以在同一地盘起私楼私卖，赚得仲多。首置未益中产家庭，有地在手嘅地产商首先受惠。

　　首置收入限制高过居屋，但系市价折扣仲高过居屋，只有唔畀市场出售先可以抵消呢种唔合理嘅逻辑。不过，禁止市场出售同埋不能享受资本升值，亦都违反咗买楼逻辑。政府平价卖层楼畀中产家庭，如果冇咗资产升值嘅帮助，一样系永远储唔到首期买楼，薪酬升幅系追唔上楼价。买楼而没有升值嘅好处，同租楼冇分别，即系租公屋。

　　万一首置同私楼混合发展，首置客心理更加唔平衡。隔篱座楼价升一倍，我呢座就供完都冇着数，卖返畀政府都攞唔返个本，达唔到置业阶梯嘅目的。

　　夹心阶层置业并非破天荒，不过唔太成功，因为政府资助一班有收入但冇资产嘅人，系好难达到公平原则。上一次夹屋失败而回，系因为撞正1997后楼价大跌，苦主直情示威抗议想踢契攞返个订。而家楼价急速向上，楼价似乎好难大跌。用市价四折卖畀有收入嘅人士，等於签了一个超长期租约，等佢哋慢慢储首期买私楼。但系出售限制，令首置客嘅福利比平价买咗层公屋嘅更不如，对累积财富非常不利。

　　首置可能令你成世有屋住，唔怕交贵租。但作为置业阶梯，令自己财富升值就未必做得到。等到10月细节公布，首置唔一定如想像中咁受欢迎。