地產博客 > 絲絲細語 返回
瀏覽人次:17012    回應:0
絲絲細語

獨立屋平租

 

左丁山

2020年1月13日

  與旅遊R在iSquare南海一號食完午飯,拜拜一聲,自己要搵路行,唔落地鐵站,直行去天星碼頭搭船過海(左丁山有資格免費),再經IFC行番寫字樓,行路時間足以消化一餐午飯。

  出咗天星碼頭行到IFC,遇見外資經紀行聯席董事,專負責豪宅租務嘅測量K,順口問佢好唔好生意,測量K話:「你話呢!現在外資對香港持觀望態度,暫時延遲派新expat來港,我少咗一批客戶啦!不妨你同我租番一間house,只係十二萬銀租一個月!」食我隻車咩,咁貴?測量K話:「南區獨立屋,租開15萬,業主有幾間屋有租約嘅,點知有三個外國租客駐港夠鐘調走咗,新人唔知幾時到,業主猛咁搵人接手租,所以肯減租益你呀!」

  今時今日,月租12萬確係幾蝦人,如果唔係公司畀租,要租客自付,即使係高層管理人員,都覺得肉痛。今天跨國公司為海外僱員租屋,已無30年前咁疏爽,計數計得好緊要,要求多多之僱員(例如人工高,租金高,子女教育津貼高),一遇上經濟不景氣,就成為優先炒魷人物,想襟玩啲,就唔好要求在香港住大大間獨立屋。

  左丁山對測量K講:「你叫業主放盤賣啦,橫掂佢早年買番嚟,已賺到笑。」測量K話:「鬼唔知,但見過高價之後,要佢劈價幾百萬,佢又唔捨得,雖則仍然賺好多錢,偏偏現在大型獨立屋幾難出到手,有幾個原因,(一)強國人來港買呢類屋人數大減;(二)豪宅單價高,本地人識得要求業主大劈價;(三)供應量係有噃,因為一啲早期買入獨立屋之富翁,現已係七八十歲,上落屋內樓梯不便,我知道有幾位就係落樓梯仆親,要入醫院個幾月,斷骨也。老富豪?家時興住一層幾千呎嘅豪宅(例:Opus)或買相連單位打通,而要賣走自己間複式獨立屋。」乜獨立屋冇?嘅咩?測量K話:「兩三層高嘅?係油壓式,比較慢,成功人士多數鍾意快,行樓梯,點知人老了就易生意外!」原來如此,老富豪竟然有此問題,以前未諗過。年輕富豪有機會嘞,三十幾歲就大發嘅科技人,不妨諗諗。與測量K拜拜,未行到IFC已收到一位朋友短訊:「我買唔到口罩,屋企附近斷貨了!」使唔使咁驚呀,武漢不明肺炎殺到埋身咩?如重演2003沙士一幕,林鄭月娥都幾難翻身。碰啱食衞局局長係得把口嘅陳肇始,香港人唯有自求多福努力清潔! 

 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼