地產博客 > 絲絲細語 返回
瀏覽人次:18436    回應:0
絲絲細語

空置稅困擾豪宅

 

左丁山

2018年10月30日

  地產集團董事T請吃午飯,係一年一度,旨在交流時事及經濟意見。做地產噃,一開口就係講填海,而唔係目前地產市道。左丁山立場清晰,支持填海,地產T聽得唔順耳,聲言反對,大體理由與一啲本土關注組差唔多,就係話要政府先搞棕地農地,至於高爾夫球場呢,商界幾乎一面倒同聲反對收回高球場嘅,唔駛討論嘞!但點解有啲商界人士,特別係地產界人士,也反對填海呢?理由唔駛講咁明嘅,正是人不為己,天誅地滅(左丁山讀書時從金庸社論學到嘅道理),如果我做麵粉廠,我邊度想有人在我工廠隔籬開多一間比我大十倍嘅麵粉廠呀。

  中原地產老闆之一施永青係要畫公仔畫出腸,在am730專欄直指最反對填海之派系就係環保派、民粹政客以及地產商人,其中尤以地產商在幕後反對得最落力。一啲simple and naive分析師以為搞填海係明益地產商,涉及利益輸送,唔該讀多兩次施永青嘅大作。要記住,一聲話填海啫,山頂豪宅地皮立即流標,點解咁啱嘅呢?一來係地產商恐怕他日真係填海,土地供應大增,買地自然小心好多,二來呢?碰啱有此招標時機,向林鄭表明態度都係合乎常理嘅情況啩。

  文輝道究竟入標價若干,目前不知,左丁山素來反對公地不拍賣而招標,林鄭做發展局局長時,公開拍賣改為招標,實在與最佳管治行為嘅公平、透明度標準背道而馳,間接助長地價炒作,帶動樓價上升。假使文輝道係公平拍賣嘅話,我地可能會知道地產商出價出到四萬蚊一平方呎就縮手,政府拍賣官不滿意,認為不及底價而收回。如果這是真的,地價一定有負面反應。特區政府口口聲聲講沒有高地價政策,但同時特首又再重申,絕不賤賣土地。你認為有無矛盾呢?地產T話投標文輝道者不多,出價最高者聽聞遠遠不及政府底價每呎6萬元。講講吓,地產T飲咗兩杯紅酒之後,就話空置稅令佢失眠。「平價納米房」預售,就話可以一Q清袋啫,有啲在山上嘅獨立豪宅就好難一次過賣晒,經常需時間逐間屋賣,隨時賣足兩年。所以空置稅實際上對豪宅幾有殺傷力。咪有人話安排短期租約,短到兩個月都有嘅,地產T話呢啲方法冇乜大作用,管理麻煩到極,豪宅特別難以短期出租嚟避過空置稅,呢招對壓抑樓價無用,只係傷及地產商啫!

 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼