地產博客 > 脫苦海‧梁隼 返回
瀏覽人次:32881    回應:1
脫苦海‧梁隼
脫苦海‧梁隼
政府又想好心做壞事
梁隼
2015年2月26日

  一元復始,萬象更新,我梁隼在此欄先向眾網友讀者拜年,祝大家心想事成,身體健康。

  財政司司長在年初七人日公佈財政預算案,內容也算得上是份大禮物,當中以薪俸稅、個人利得稅及公司利得稅獲最高退稅兩萬元最闊綽,因為坊間普遍估計最高退稅一萬至萬五元。

  另外一眾業主都關注財爺會否出招調控樓市,一如財爺事先張揚,財政預算案中只係強調增加供應,已經講了很多年,大家早已習慣,另外仲有一個看似創新但實際又係炒冷飯的東西,說的是建議透過按揭證劵公司借款俾未補地價居屋業主,只要一日唔賣樓或業主仍然健在就可以無需還本,鼓勵居屋業主補地價可以出租單位增加供應。

  按揭證劵公司在2010年已經有一個「補價貸款擔保計劃」,不過當時係要還本金的,而且貸款額有上限的,本身層樓的按揭加補價貸款加埋唔可以超過市值樓價的90%,聽落一點都唔吸引,所以財爺今趟只可以話係改良版,而不是創新招。

  政府此舉目的當然想透過鼓勵居屋業主補地價,間接增加市場供應,不過又真係好間接,仲會有好多副作用,最直接想到的就係好多未補地價居屋都係自住的,即係話業主借錢補地價後可以提供一個單位出來放租,但同時又要在市場上找另一個單位居住,一來一回即是沒有增加過。

  另外就係誘因不大,雖然話借左唔駛還本,但利息都總要找的,即是說,居屋業主借錢補地價後把單位出租,就算要俾市值租,都因為多了一筆利息開支而令到實際收益下跌,與此同時本身個硬件又唔配收比市價貴的租金,計計下似乎無著數。

  而政府去年的白居二計劃,已令未補地價的居屋價值比已補地價的居屋差距收窄,例如一個市價七折發售的白居二單位,自由市場賣緊一萬元一呎,居二市場可能賣緊八千至九千一呎,既然如此,又何需刻意去補地價去一個合理但有折讓的市場?

  最危險的是,未補地價的居屋係唔可以加按的,現在政府叫按保公司借錢俾居屋業主補地價,是否想製造多幾個N按單位,加速樓市爆煲呢?

  想增加供應,都係花多點心思去物色新土地吧。

 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼
1. 收租王Tony 2015-02-27 14:13:36

佢原意唔係咁

佢係想好似以前72家房客咁,淨係分租房間..

佢話計劃主要協助冇入息證明既長者,將吉左出黎既房,分租俾人,用盡個單位住滿人!

但佢計錯數,宜家多左咁多租霸,d長者點會應付到,仲有,如果佢唔分租,自己出去租個細d既單位諗位賺租金差額,仲大鑊,自住單位租左俾租霸,自己出到去先發現原來冇人肯租俾長者,因為怕佢拉柴影響樓價,就算有人肯租,個單位都唔方好,仲有個租霸叫佢維修呢樣維修果樣恰佢老,唔整又唔交租,到時就真係大檸樂,佢收唔到租,又要交租,自己冇錢交租冇得住,又收唔返個出租居屋單位,咁就我都唔知點算......

 

如果佢自己個居屋單位有個租客拉埋柴變左凶宅,你知阿婆點識選租客姐,咁就本都冇左大半,銀行話資不抵債要收樓,咁就大鑊了!

 

分租單位今時今日阿婆搞唔掂的,邊有人鐘意同老人家住?你話個包租婆青春無敵就話姐!相見好同住難,同要阿婆將間居屋分租一齊住,俾租客謀財害命吞埋間屋既機會大d...