地產博客 > 文亮言 返回
瀏覽人次:20342    回應:19
文亮言

謹防債仔的實力太強大

 

湯文亮博士

紀惠集團行政總裁
2020年2月24日

  有老友問我點解唔開財務公司,不但幫人仲可以收取高息,比買樓收租唔知好幾多倍。我非常同意,如果債仔有錢還的話,債仔冇錢都冇辦法,最弊就是債仔有錢唔還,仲講風涼說話,就會頂住條氣。既然如此,不如老老實實做收租佬,雖然賺很少錢,但心安理得。

  我有不少朋友曾經借錢畀非常有實力的人。最初的時候仲會話對方有實力,又願意畀高息,這樣的生意做過世都願,到後期不但沒有提及,還四處搵人接手他的債務,理由是債仔本息不還,點追都沒有反應,甚至因為債仔太有實力,連追也不敢,恐怕被債仔反咬誹謗,不但唔還錢,仲被債仔告賠償。當日因為債仔有實力而借錢,原來債仔太有實力是很難叫他們還錢,那些人一定唔知道借錢畀人的第一戒條,就是不要借錢畀實力強大的人,好似當日劉備借荊州一樣,有借冇還。

  不少人話朋友有通財之義。我認為除非迫不得已,最好唔好問老友借錢,問銀行可以,甚至問財務公司也可以,雖然要畀利息,但這是值得的。如果問朋友借錢,其實是除了借錢之外,買欠了一個人情,錢債易還,人情債難還。即使連本帶息歸還,但人債仍在,難保他日有機會,那人問自己借錢,而且數目不菲,有如何處理。如果借,希望可以有得收返;如果唔借,一定會畀人鬧忘恩負義。所以,最徹底的方法就是不要問人借錢,尤其是在沒有迫切性的情況下。不過,有很多人忘記這一點,他們會話試吓雙方交情,是否達到通財之義這個地埗,其實是自討苦吃。

  有人話就算唔借錢畀人,可以買債券,收息比收租高不知幾多。其實他們不明白,買債券同借錢畀人差不多,發債的人是債仔,買債券的人是債主。一般來說,債仔的實力強大過債主不知多少倍,買債即是犯了借錢畀人的第一戒條。有一日,發債的人話要以折數找數,如果債券持有人唔應承,隨時連渣都冇,又如何處理。好似現在已經有類似的情況出現,買了債券的人應該有心理準備,債券價格可能會隨時唔見了一截。

 
 
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

會員登入
登入ID 或 網名
密碼
1. 龍虎豹 2020-02-24 11:52:23
慎防
2. 真真薯片 2020-02-24 12:02:08
我都識人向實力強大,仲要好出名既人借錢,結果到期唔還,又唔敢追,心驚膽跳左幾個月,最後對方有還本金,但冇還息,已經笑晒口仲要講多謝
3. 學到嘢 2020-02-24 12:25:15
多謝湯博士嘅文章。拜讀博士嘅文章,勝讀十年書,多謝。
4. 十一哥 2020-02-24 13:27:05
銀両借到手…實力就強到同債主冇朋友。

5. C叔 2020-02-24 15:05:09
借錢比人,收十足抵押,已夠朋友。
6. 收十足抵押,已夠朋友。 2020-02-24 15:16:19
神哥開善堂
7. 亞Q 2020-02-24 16:40:16
有銀行擺係度佢唔去借而問你借 , 應該知道乜嘢事喇 !
8. 鳥5 2020-02-24 19:05:11
利大本無歸@雞籠大多人信@雞籠要多人信,就要做到大你唔覺得佢係雞籠@先敬羅衣後敬人@豬西要嫁得出就要化妝@係咪?重複又重複嘅歷史 ..
9. 鳥5 2020-02-24 19:09:31
財仔打靶盤。等埋手續。今年年尾到。冇得守
10. 鳥5 2020-02-24 19:12:43
金融本身冇生產力!圈錢遊戲。真係咁易玩?坐喺度簽個名,將啲錢搬嚟搬去。咁容易就發達?邊個係羊邊個係狼?
11. 引刀一快 2020-02-24 19:55:41
鳥5兄

金融冇生產力啫,佢促進生產力嘛。大陸又開始印銀紙喇。
12. 鳥5 2020-02-24 19:57:23
朋友要有疏財之義。唔好因為佢(掂)所以借。5掂先諗借。量力而為。但預咗有借冇還。唔可以用生意角度。諗得多都無謂。
13. 鳥5 2020-02-24 20:04:37
刀兄我都話你有sense啦。兩者相似呀。實有不同。。可以促進。对!大陸實體今年見底。香港仲未過關要等年半,下年年尾。大陸國內而家係現金是王。香港未到。又五成機會跟日本後塵!過唔到關。大鳩鑊!香港人之價值。同上次沙士天同地!而家香港得返個價格。出年價格冇一大截到時唔知咩反應。。不欲多言.
14. 鳥5 2020-02-24 20:23:59
我睇到就係香港人而家用鬥(賴)。促進生產力!得嗎?靠借可以生嗎?日本?以本傷人後,借大5洗死。咁咪冇得生!出年香港後生就先有機會。如果社會財大就5死!咪係做錯商業決定,借大就5死?。。攬炒其實係宇宙實力平衡。。嚟緊嗰兩年,好很殘忍。生存戰。。在下不欲多言靜觀其變。
15. 十郎 2020-02-24 22:16:17


      後日宣讀財政預算 , 我估一定派錢 , 否則怎樣面對民情 ? 不會是一萬蚊 , 因為要表演係經過考慮 , 有主見 , 唔係你話幾多就幾多。最大可能是8000蚊。哈哈哈哈哈哈。

16. 最大可能是8000蚊。 2020-02-24 22:46:54
當年曾儲財好鐘意幫你蓄落強姦金,禾估可以派一皮但是派落醫補度俾人睇醫生,奇英則是發醫療券等啲人無事養生。
17. 十郎 2020-02-24 23:05:49


      咁樣即係冇現金收 , 阿女話唔制呀。哈哈哈哈哈哈。


18. 引刀一快 2020-02-25 07:39:30
鳥5兄

“朋友要有疏財之義。唔好因為佢(掂)所以借。5掂先諗借。”非常欣賞呢段,古道熱腸,句句在理。不過............呢啲正正就係人世間嘅悲哀,今日世道,人心不古。通財之義係義氣,預咗唔還係兒戲,借係顧全友情,唔還係反面無情。借一次保住不失朋友,唔還第二次仲借唔借?唔借依然係要失。有借無還嘅朋友,你係應該望佢有錢都唔還,還是望佢一世都唔掂先至冇錢還好呢?
20. 十郎 2020-02-26 11:38:06


      真係派10000。

      估錯都有獎。哈哈哈哈哈哈。