地產博客 > 文亮言 返回
瀏覽人次:12970    回應:26
文亮言
信貸評級米芝蓮化
 
湯文亮博士
紀惠集團行政總裁
2020年1月22日

  穆迪將香港信貸評級下降一級,現在只比中國高一級,香港官員自不然瓜瓜嘈,但嘈都冇用,穆迪自然有合理解釋,既然如此,何不反方向考慮,倘若香港通過了「逃犯條例」,就算穆迪沒有將香港評級下降,但資金一定會撤離,港元兌美元一定會貼近弱方保證,銀行同業拆息飆高,銀行體系結餘下降,現在剛剛相反,由此可見,穆迪的評級是不切實際,甚至可以說是米芝蓮化。

  何謂米芝蓮化,假若有一個米芝蓮星探去到一間餐廳,見到餐廳經常被人搗亂,而伙計亦嚴陣以待,即使出品與服務比以往好,米芝蓮亦有理冇理將餐廳的評級下降一級,這是穩陣做法,穆迪見到香港在過去七個月社運活動不絕,到現在仍未見平息跡象,最穩陣做法同米芝蓮一樣,將香港評級下降一級,所以我話信貸評級米芝蓮化。

  穆迪認為美國去年底推出的「香港人權及民主法案」,令到美國可以影響香港施政,繼而削弱香港自治能力,我覺得穆迪犯了一個嚴重錯誤,「人權法」對美國的負面影響比香港大不知多少倍,自從美國推出人權法之後,不少國家富豪知道美國隨時可以對任何國家推出制裁法案,凍結有關人士在美國以及美國金融體系資產,已經靜靜地將資金撤離美國,做成美匯轉弱,如果繼續下去,美國可能要加息,這是特朗普的惡夢,所以,穆迪應該降低美國信貸評級而非香港,不過大家亦知道,就算畀個天穆迪做膽,都唔敢降低美國信貸評級。

  其實,穆迪今次將香港信貸評級下降亦非壞事,當社會回復正常,穆迪自然會調升香港信貸評級,唔通有得跌冇得升,下跌之後回升比不升不跌好得多,另外,由於穆迪將香港評級下降,財爺就有藉口不派錢,否則,赤字有機會超出上限,影響港府以及有關公營機構的發債成本,總之一句,既來之則安之,做好自己本份,穆迪始終會將香港信貸評級調高。

 
 
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

會員登入
登入ID 或 網名
密碼
1. 就算畀個天穆迪做膽,都唔敢降低美國信貸評級 2020-01-22 10:59:59
直到帝幣地位被動搖, 甚至被 partly 取代, 帝評都不會下調評級的。
2. 十郎 2020-01-22 11:19:00


      信木敵 , 不如信風水佬。

      如果準確的話 , 就唔會有雷曼破產啦 , 呃飯食。

3. 活在當下 2020-01-22 11:49:39
政府千萬不要亂派錢,削弱香港根基……
派錢不會得到重大好處或市民讚賞
4. 亂派錢 2020-01-22 12:00:49
在一個窮得只剩下錢嘅地方派錢, 週而復始冇人做實事, 派錢嘅人嘅工作係諗吓派幾多錢同點派, 收錢嘅人嘅工作係諗吓點收同點使。
5. Fisherman 2020-01-22 12:01:31
鄭女士好似患左重病,睇西醫唔掂,睇中醫,中西好似都冇改善,唯有睇神醫,亂石投林。亂駛錢,到頭來駛得七七八八,要財仔打救。
6. 十郎 2020-01-22 12:11:08


      澳門年年派錢 , 仲越派越多。有冇削弱根基 ?

7. 有冇削弱根基 ? 2020-01-22 12:46:39
十哥有沒有去過葡萄牙?
8. 十郎 2020-01-22 12:54:55


      正苦坐擁4萬億儲備 , 740萬香港人分 , 每人得54萬 , 連細路計埋800萬分是50萬。

      唔派錢就可以給 “ 大花筒 ”起多幾條17億行人天橋囉。17億可以買兩架波音737 , 波音做兩架飛機 , 唔夠一條行人天橋 , 佢老細真係頭都暈。

9. 十郎 2020-01-22 13:02:03


      唔通我會贊成 , 孟加拉派錢咩。睇情況嘛。

10. 十一哥 2020-01-22 14:53:51
十哥  海洋公園是旦噏…執執都過百億、點回本 ? 執鍊咗佢好過啦 !  真係與其比9官亂fing…不如分番市民自己洗..雨露均沾…肯定百業興旺 。

11. 十郎 2020-01-22 15:01:17


      你驚派得死佢咩 , 個個有左錢就唔租劏房點算。劏房波識得點諗嘅。

12. 是旦噏 2020-01-22 15:04:16
海浪公園是冇掩動物籠, 在自由行大行其道嘅時候都無法賺錢, 然後就話啲野舊, 但就連換野嘅錢都冇。如果要做落去, 一係做本土人最擅長嘅包租公分判俾長隆, 一係改做灰位, 先收返一萬億, 老舊機動遊戲冇人坐照開更加貼題, 保險都慳返。
13. 活在當下 2020-01-22 15:34:04
人云亦云,條天橋唔是普通的過路天橋,而是連接多點的長 連接天橋。
大家千萬不要有分身家的心態,這樣一定坐食山崩……
14. 十郎 2020-01-22 16:16:16


      南區整灰位 ? 冇人反對 ?

      如果有我都定一個。

15. 十一哥 2020-01-22 16:32:18
普通行人天橋…為乜使費要玩到咁唔普通 ? 幾多點連接都計唔出條咁嘅天文數 !

16. 十郎 2020-01-22 16:43:09


      每個人派一萬 , 都唔駛800億。2018年盈餘係1,400億啊。

17. 活在當下 2020-01-22 19:33:54
依家政府是年度赤字,唔是盈餘。
派錢就等於……敗家仔叫老豆老母分身家!
18. 十郎 2020-01-22 19:41:58


      你唔好信劏房波喇。

      17億一條天橋 , 你都唔覺得貴 ? 我敗家都唔會贊成。


19. 鳥5 2020-01-22 22:16:51
有一個概念大家要搞清楚先,中國美國歐盟日本全部發達國家其實已經係發債發到雲,香港係(正數).香港很發債阿爺肯包底....根本就大把錢..如果派錢保得到個政權真係唔好慳... 
20. 鳥5 2020-01-22 22:24:53
政府發行債券就係子孫還,宜家高地價政策搞到子孫都冇...如果能夠發展到下一代千祈唔好慳...有啲層麵20萬劏房戶..到佢地生存唔到,全港8百萬人都要埋單...還政於民天公地義... 政府唔識派錢唔等於啲錢係佢....
21. 鳥5 2020-01-22 22:25:51
更正還富於民
22. 鳥5 2020-01-22 22:34:02
(貨幣)..即係欠單....誰又欠了誰?幻想下
23. 鳥5 2020-01-22 23:40:32
一個政府嘅財長   唔係一個大型商業機構嘅會計部....兩個宇宙
24. 十一哥 2020-01-23 08:57:39
雀仔  本來香港呢個大檔…座喺黃金位…長賭長有、就係班9官特登玩寸個party、硬係唔起宿舍公屋~做好伙記福利、變相/迫伙記落注賭埋一份、敢賭嘅~得失各安天命、安份唔賭~做極得個~輸實、身處煙花之地..望去個個飛黃騰達、心理點平衡…有人點火梗爆啦!…

25. 有一個概念 2020-01-23 10:07:05
雀哥, 阿爺同講苦對錢財嘅概念好唔同, 講苦唔係冇外債, 而係用高轉數等啲人唔黎攞。
26. 引刀一快 2020-01-23 14:43:06
https://mp.weixin.qq.com/s/WgSTkYERyP0pTbwjsM9s_A

呢啲叫做“解鈴還須繫鈴人”
豬年用豬瘟整你唔死,鼠年用竹鼠蝠鼠海狸鼠整死你。