賣了樓之後有何打算

　　在全城一致唱淡之下，中原指數六連跌，但幅度又不算很大，比高峰時只跌了8％，或者還要跌多幾個星期才可以回穩，但已經令到賣了樓的人非常雀躍，認為自己做了前所未有咁好的決定，同時嘲笑那些仍未賣樓的業主，認為他們已經錯過了樓市的逃生門。我亦經常被人問，如果移民潮持續，美聯儲局又加息，我有何打算，我話只得一招，就是高資產低負債，即使加息，應該可以頂得住。至於移民潮，有人走亦有人嚟，一雞死一雞鳴而已，唔需要有何打算。

　　輪到我問那些賣了樓的業主，賣了樓之後有何打算，如果是移民就不用回答。我想唔到有部分賣樓的業主會話，有錢根本不用打算，首先租一個比賣走的更好住宅單位，如果樓價跌得咁上下，就用低價買返一個住宅單位，這才是投資之道，並不是死守唔賣樓。

　　那些賣樓業主九成未試過租樓，賣樓之前那些幫他們賣樓的物業代理會話，又平又靚的租盤多到成街都係，但賣樓之後，那些代理與又靚又平的租盤都失了蹤，如果搵第二個物業代理幫手租樓，可能得到回應是賣樓的時候唔搵佢，點解搵佢幫手租樓，唔係冇租盤，不過會是那些地點不佳，方向不好兼低層，冇人吼的租盤。

　　 唔好以為有錢大晒，香港的業主是很寸，況且是現在，在辣招之下，香港人買樓收租的人已經買少見少，業主對租客的要求很嚴謹，國內學生早已知道這個困難，不但願意付較高租金，而且一交就交一年租，試問那些賣樓的業主又如何比拼。所以，如果要賣樓，首先嘗試去租樓，甚至租了樓才賣。否則，到交樓時仍未租到樓就知道痛苦。