首置增加供應，會否推冧樓價？

　　會德豐搶先表示對公私營合作有興趣，講到明大埔洞梓項目可以配合首置上車盤，證明呢個計劃未益中產之前，先令地產商受惠，搶住參與。

　　公私營合作，城規會過關可能容易啲。公營部分補地價可能少啲，但係建築成本同私樓相近，咁賣公營樓嘅一部分撇除地價，賺嘅比率可能仲高過連同補地價嘅私樓部分。在農地上用建築成本起樓再賣，梗係好賺過農地補地價再加建築成本攞去賣，條數好易計。

　　公私營混為一體，首置會唔會推冧同一地盤嘅私樓？唔會，你睇吓康怡康山就知。康怡係私樓，康山係居屋，康山位置比康怡仲好，又近太古城，又近港鐵站，但係康山嘅價錢整體係低過康怡，始終係居屋。

　　發展商以前唔介意居屋私樓一齊起，而家又點會介意檔次高一級嘅首置與私樓共存？只要首置起細啲，裝修簡單啲，加上政府唔俾你市場轉讓，首置係唔會完全吃掉私樓購買力。加上有首置做籌碼，規劃較易過關，仲有首置人士帶旺本來係農地嘅偏遠地區，方便引進配套設施，賣樓比純私樓項目更有勝算。

　　發展商嘅腦筋，論創新未必夠新經濟，但論銷售策略，香港地產商全球第一，淨係睇吓咁多買樓折扣優惠令你唔買唔得，就知道發展商計過嘅數，永冇死錯人。首置最叫人興奮嘅，唔係無殼中產，係持有大量土地儲備嘅地產商。

　　首置增加了供應，會否推冧樓價？首置本身係唔會，因為首置嘅對象係從未買樓同冇首期嘅中產，佢哋唔係私樓嘅潛在買家。但係公私營合作，與首置同一地盤嘅私樓一齊推出市場，等於私樓因為規劃較易過關而供應稍增，咁就對樓價有影響。每年多咗一手供應，總有啲用合理價開盤去貨。

　　但係樓價不再大升，唔代表地產商賺少咗。建築成本其實已經係一個固定數目，有升冇減，問題係地價多少，先決定樓盤可以賺多少。假如公私營合作令城規較易過關之餘，補地價部分有優惠，就算樓價沒有飛升，地產商利潤唔一定少咗。價錢賣得唔高，成本低咗同樣可以大賺。換言之，計嚟計去，首置點計，最開心都應該未輪到中產。你見最近本地地產商嘅股價，已經反映咗市場都係同樣想法。