領展車位狂加價 吸血怪獸誰養成

新聞資訊 > 地產新聞 返回
瀏覽人次 : 5068
地產新聞
領展車位狂加價 吸血怪獸誰養成
(東方) 2018年4月16日
上個月網絡有段瘋傳影片,影住兩個女士,據說喺紐約一個停車場入面,使出「人肉霸車位」嚟爭位,呢種做法梗係唔值得鼓勵啦,不過睇番香港,一樣有關於車位嘅瘋狂事,講緊嘅之唔係領展車位租金仲貴過公屋單位囉,叫市民點頂呀?

呢,尋日就有團體去咗觀塘領展總部抗議,話自從房屋委員會停車場元旦加租後,領展唔執輸又加埋一份,加幅仲要係房委會嘅兩倍,好似黃大仙東頭二邨、天水圍天瑞邨同天耀邨,停車場私家車車位加租大約一成二,即係每個月平均要畀多二百三十元至三百二十元嚟泊車,有市民話每月要使大約二千二百元交車場租,仲貴過公屋屋租,都咪話唔誇張。不過停車場又漏水又跌灰,貴得嚟唔值囉,有立法會議員直頭用「瘋狂」嚟形容領展,呼籲全港受領展蹂躪嘅車主企出嚟表態咁話。

講真,住得屋邨單位,基本上都係基層市民,領展竟然夠膽死一個車位收人二千幾元月租,仲有冇離譜啲吖,公屋都係交緊千幾元屋租咋,車位租金妹仔竟然大過主人婆,點止荒謬咁簡單。打工仔今年人工加幅最多都係得三個巴仙,領展一加就一成二,直頭當市民係水魚,撳住嚟搶,基層市民生活只有百上加斤,苦上加苦啦。

話時話,領展咁多年嚟做過嘅衰嘢都唔少,包括加成倍租去逼走傳統小店,引入大財團進駐商場,將本來服務居民嘅屋邨商場變成迎合遊客嘅購物城,唔少傳統街市更加因為捱唔起貴租而「被消失」,結果羊毛出喺羊身上,居民唔止少咗選擇,更要被迫捱貴餸。仲有呀,領展因為無利可圖,就算房署想加建啲方便市民嘅基本設施,佢都遲遲唔開綠燈,話領展係一頭認錢唔認人嘅怪獸,都無話錯佢。

講到尾,領展獅子開大口,都係政府縱容出嚟,如果政府唔係一味以自由市場做擋箭牌,對領展瘋狂加價、逼退小商戶長期坐視不理,都唔會搞到領展有恃無恐,變本加厲。與其話「小政府,大市場」,不如話「無政府,任你狂」。政府將啲公共資產賣咗就關人個關,由得無良商家自由壓榨市民,同幫兇冇分別,仲要衰到預算案派少少糖,轉個頭衣食住行樣樣加番晒,市民唔只冇着數到,仲要嘔番凸,你話呢個政府心腸幾壞呢。

冇錯,港府高官係話過會處理領展、港鐵同強積金,講到好有決心咁,但呢「三座大山」嘅擾民程度非但冇減輕過,反而愈來愈重添,所以話啫,官僚靠得住,豬乸會上樹!