孟子曰∶「有恒产者有恒心，无恒产者无恒心。苟无恒心，放辟邪侈，无不为已。」有办你睇，今时今日香港一大批基层市民莫讲话冇「恒产」，连搵个人住嘅窦口都难，成个社会有咩法子唔乌烟瘴气，七国咁乱吖！
特别系嗰二十几万劏房户，叫天不应叫地不闻，嗰种水深火热法，绝对不足为外人道。有团体寻日公布研究结果，发现劏房租金指数较旧年上升近百分之八，较旧年全港各类私人住宅单位租金指数上升幅度更高，名副其实「跑赢大市」；如果计埋电费，相关指数亦比旧年上升百分之七，创五年来新高。
听吓过来人点讲喇，有劏房户一家三口逼喺面积七十尺嘅豆腐膶单位，每月四千银租金占家庭总支出三成都算嘞，最惨系衞生情况惨不忍睹，屋内唯一窗口对正天井，一开窗，当堂好似邓伯伯话斋，乌蝇蚊虫蜂拥而入，谂起都毛管戙！而即使系咁不堪嘅蜗居，都仲要担心业主随时加租，劏房咁好搵，唔怪得高官家人都要分一杯羹喇！
话时话，类似情况只系冰山一角咋。早排港府宣布透过关爱基金拨款，向二万四千个低收入住户提供一笔过拨款，帮助佢哋灭虫灭虱防鼠患。先唔好讲计划系咪杯水车薪，但堂堂一个国际大都市，人均收入全球数一数二，竟然有咁多人「与鼠同眠」，唔知嘅仲以为去咗第三世界贫民窟，咁都唔系「香港之耻」，点至系？
始终都系呢句∶有头发冇人想做瘌痢，鬼唔知住公屋可以提早实现财务自由咩？问题系一方面轮上楼条队仲长过万里长城，家阵已经去到平均五年半，三年承诺同八万五一样，早就「唔存在」；另一方面公屋落成量远远低於目标，今年度估计只有约二万四千个公屋单位可供编配，创九七年以来新低，喺咁嘅情况下，轮到公屋点止开心过中六合彩，直头祖坟冒青烟添喇！
大家有眼见，特衰政府拓土建屋讲多过做，一味好高骛远、画饼充饥，死系要推冇十几廿年唔见功嘅「明日大屿」造岛计划；明明有大量官地晒太阳养蚊，都唔识地尽其用，一味整色整水、小打小闹。好似同非政府机构合办嘅过渡性房屋咁，僧多粥少之余连治标都讲唔上，几年眨吓眼过去，唔通要住户打回原形住番劏房咩！又好似房协未补价资助出售房屋出租计划，要求三唔识七嘅家庭「共享」单位，坚离地到冇朋友，结果自然无人问津。
悠悠万事，民生为大。特衰政府牙斩斩话未来要聚焦经济民生，系就快唔好等下个礼拜，坐言起行大庇天下寒士，胜过口噏噏「道歉」多多声！
App下载
