上个月网络有段疯传影片，影住两个女士，据说喺纽约一个停车场入面，使出「人肉霸车位」嚟争位，呢种做法梗系唔值得鼓励啦，不过睇番香港，一样有关於车位嘅疯狂事，讲紧嘅之唔系领展车位租金仲贵过公屋单位罗，叫市民点顶呀？
呢，寻日就有团体去咗观塘领展总部抗议，话自从房屋委员会停车场元旦加租后，领展唔执输又加埋一份，加幅仲要系房委会嘅两倍，好似黄大仙东头二邨、天水围天瑞邨同天耀邨，停车场私家车车位加租大约一成二，即系每个月平均要畀多二百三十元至三百二十元嚟泊车，有市民话每月要使大约二千二百元交车场租，仲贵过公屋屋租，都咪话唔夸张。不过停车场又漏水又跌灰，贵得嚟唔值罗，有立法会议员直头用「疯狂」嚟形容领展，呼吁全港受领展蹂躏嘅车主企出嚟表态咁话。
讲真，住得屋邨单位，基本上都系基层市民，领展竟然够胆死一个车位收人二千几元月租，仲有冇离谱啲吖，公屋都系交紧千几元屋租咋，车位租金妹仔竟然大过主人婆，点止荒谬咁简单。打工仔今年人工加幅最多都系得三个巴仙，领展一加就一成二，直头当市民系水鱼，揿住嚟抢，基层市民生活只有百上加斤，苦上加苦啦。
话时话，领展咁多年嚟做过嘅衰嘢都唔少，包括加成倍租去逼走传统小店，引入大财团进驻商场，将本来服务居民嘅屋邨商场变成迎合游客嘅购物城，唔少传统街市更加因为捱唔起贵租而「被消失」，结果羊毛出喺羊身上，居民唔止少咗选择，更要被迫捱贵餸。仲有呀，领展因为无利可图，就算房署想加建啲方便市民嘅基本设施，佢都迟迟唔开绿灯，话领展系一头认钱唔认人嘅怪兽，都无话错佢。
讲到尾，领展狮子开大口，都系政府纵容出嚟，如果政府唔系一味以自由市场做挡箭牌，对领展疯狂加价、逼退小商户长期坐视不理，都唔会搞到领展有恃无恐，变本加厉。与其话「小政府，大市场」，不如话「无政府，任你狂」。政府将啲公共资产卖咗就关人个关，由得无良商家自由压榨市民，同帮凶冇分别，仲要衰到预算案派少少糖，转个头衣食住行样样加番晒，市民唔只冇着数到，仲要呕番凸，你话呢个政府心肠几坏呢。
冇错，港府高官系话过会处理领展、港铁同强积金，讲到好有决心咁，但呢「三座大山」嘅扰民程度非但冇减轻过，反而愈来愈重添，所以话啫，官僚靠得住，猪乸会上树！
App下载
