系人都知，港府库房漏油，肥到袜都着唔落，偏偏官老爷最爱哭穷，家阵仲衰到连觅地建屋都玩呢一套，唔系打郊野公园主意，就系反问地从何来，其实港府收埋大把闲置土地，宁愿丢空养蚊都唔拎出嚟发展，博乜呢？
呢届政府时日无多，之但系打郊野公园主意就死心不息，呢次仲搵埋房协过桥「研究」添，点知消息一出，即刻激起唔少争议，环保团体固然大大声反对，政客亦批评当局绕过立法会系违反程序，就连房协委员都承认难度唔小，港府嘅如意算盘系咪打得响，真系讲唔埋。梗系啦，一方面港人环保意识高涨，发展郊野公园连谂吓都变得「罪大恶极」；另一方面港府发展土地大细超，一味欺软怕硬，嫌贫爱富，授人以柄咯喎，唔阻力重重至奇。
唔系咩，港府有大把闲置土地，估计有数千公顷，就算撇除发展阻力极大嘅新界棕地，一样不愁无地可用。本报记者发现，净系康文署辖下二百多幅临时休憩用地咋，大部分唔系养蚊，就系养草。好似位於中西区嗰幅吖，位置吊脚，设施简陋，长年拍乌蝇；又好似屯门另一幅休憩用地，连附近居民都唔知有个咁嘅地方，得物无所用；茶果岭嗰幅就仲离谱，临时咗足足三十年，家阵沦为晒衫场。你话嘞，如果官老爷有好好检视土地用途，重新规划，又点会造成咁大浪费喎。
仲有呀，全港有近二百幅空置校舍用地，唔少仲系市区靓地，只有少数被改划房屋用途，大部分一直摆喺度晒太阳，简直暴殄天物。政府空置宿舍及物业亦不在少数，分布港九新界，生人霸死地都唔知为乜。至於早就成为众矢之的嘅新界棕地同埋富豪俱乐部用地，港府继续坚持不收不拆，宁愿任由少数人享受及牟利，睇见都眼冤。难为港府高官仲学人下巴轻轻，话收回棕地发展「别无他想」，讲咗当做咗，畀人闹爆就系咁解。大家睇到啦，港府觅地建屋波折重重，反对派从中作梗都系其次，最主要系自己唔争气咋。
咁当然，房屋问题积重难返，香港人始终都要面对现实，环保系重要，但有瓦遮头更加重要，如果呢度唔畀发展，嗰度唔畀起楼，无壳蜗牛永无上楼之日。所以话，发展郊野公园唔系唔得，但其他闲置土地更应优先规划，最紧要施政公平，咪一味向权贵倾斜至得o架。
点都好，夕阳政府嘅「研究」姿态大於实际，房屋问题呢个烫手山芋始终都系留番下届处理，新政府系咪「好打得」，系咪帮到港人安居乐业，即管放长双眼睇吓喇。
App下载
