海璇招標文件豪到出面

新鴻基地產(00016)表明，希望問鼎港島分層豪宅呎價新高嘅北角臨海豪宅項目海璇，正式喺尋日推出10伙招標，派發嘅招標文件亦相當揼本，絲絲可以完全感受到項目有幾豪，照咁睇，個盤呎價可以去到……？

同層AB室必須打孖買

海璇招標文件係用「非一般」嘅硬身文件袋裝住，點解係非一般？事關設計上極盡心思：文件袋底色係深藍色，配以燙金文字與波浪紋，上面印有「A RARE OPPORTUNITY TO SEIZE」（抓緊罕有機會）句子。而裏面嘅部分文件，四邊更燙上金色嘅波浪，反映到項目有幾矜貴。

今次呢批單位招標內容，規定同一座同一樓層嘅A室及B室必須由同一組投標者購買。即係一係唔買，一買就至少要打孖買。呢批單位分布喺1座10、11樓A、B室及2座10、11、12樓A、B室。同時規定準買家須先畀700萬元本票先可以參觀示範單位，截標日期為十二月十一日。

海璇坐落喺維多利亞港海邊，擁有永久嘅海景，相信呎價可以做到好癲。嗱依家香港分層住宅最貴做到實用呎價超過13.2萬元，已經係全亞洲區最高。唔知可唔可以超越呢？

余絲韻