地產論壇
登入名稱
密碼
頁數:
如何做一個優質解籤師傅
瀏覽人次:23192    回應:9

如何做一個優質解籤師傅

 

湯文亮博士

紀惠集團行政總裁
2019年2月11日

  唔知邊個將「每逢佳節倍思親」改為「每逢佳節重幾斤」,在農曆新年後,幾乎唔敢上磅,好彩在極度忍口節制之下,重了唔夠一公斤,雖然滿意,但仍然堅持在星期日早上跑十公里,其實近日天氣非常適合跑步,跑十公里不是太辛苦,跑完步去茶餐廳食個早餐,吹下水,都幾開心。

  正當我同茶餐廳老闆吹水時,聽到隔離枱有個類似阿媽女人,叫個仔唔好讀書,走去學做解籤師傅,仲話這個行業當旺,寧買當頭起,阿媽仲叫個仔問我講得啱唔啱,我當然話啱,不過,大家所見,現在解籤佬的學問水準太低,要在這行業出類拔萃,一定要入大學讀書,主修中史,副修英語,以後中外人士都殺,生意無憂,佢阿媽竟然話我講得啱,如果唔做一個本科生,以後有人以碩士甚至博士身分去做解籤佬,個仔要搵食就很艱難,仲多謝我解決了他們的難題,其實我唔知道他們多謝什麼。

  我講大家或者未必相信,我有一個小學老師,他聲學畢業,唱男高音,每年校慶都是由他領唱,後來話教字不出頭,走左去黃大仙做解籤師傅,真的是發過豬頭,十年前已經有幾層樓收租,老師咁發原來他發明了一套解籤秘芨,不會梗唱好或者唱淡,任何籤去到他的手中,無論是大吉或者下下,如果問家宅,一定會答平安,問自身就難保,問前程當然錦繡,求財就會答不遂,理由很簡單,問家宅代表很多人,如果話家宅不吉,就會攪到人心惶惶,如果問自身,即是有困難,答難保只不過是叫求籤者小心一些,前程是很遙遠的事,如果勤勤力力,加上一點運氣,一定會是錦繡,求財即是要個天跌錢落嚟,當然是不遂,人無辛苦力,那得世間財,老師憑這四招食盡解籖界,不過老師同我講,這四招是基本功,最緊要是學問水平夠,尤其是中史,死都可以拗番生,很可惜老師現在唔做,否則今年由佢解籤,雖然全部都是下下,老師一定講到是中吉甚至上上,而且不會露出破綻,全香港人都會很開心,不似得現在俾幾支籤攪到一鑊粥。

如何做一個優質解籤師傅
1. 腥港人
2019-02-11 08:58
籤無上下,你信佢,佢都係俾個意見你,無話好唔好,尤其阿主席係問時局。

畫餅充唔到飢唔駛車公勃,人人都識,咁你肚餓,當然係焗個餅/買個餅先會飽肚啦。依家無屋住,你話起明日大愚,起完我都餓死左,咪畫餅充飢囉。

流感高峰期,醫生護士做到無停手,仲要有班膠層諗出用拍片、魚蛋燒賣嚟提高效率,當然亦係石田種唔出菜。

佢話你知咁做唔work唔代表一定係下籤,咁你聽佢講,及時修正返都得嘛。你今日截中國殖民,下年繼續有樓落成,已經舒緩到房屋、醫療啦,係咪?
2. 十年前已經有幾層樓收租
2019-02-11 09:02
又一例証,無論做邊行,財富是要累積,而累積財富的方法是……
3. 很可惜老師現在唔做
2019-02-11 09:26
Lucy 唔止解, 連籤文都自己寫埋。
4. 李澤西
2019-02-11 10:35
今時今日,神棍同解籖佬都係讀書唔成,不學無術之人。所以咪一犬吠形百犬吠聲,人云亦一云囉。哈哈
5. 引刀一快
2019-02-11 11:25
呢個解籤事件真係過癮,咁樣解籤法,仲勁過人大釋法,哈哈哈哈
6. 自我陶醉
2019-02-11 14:23
所謂解籤佬,係幫善信了解籤文意思嘅人,如果任意發揮,隨意演繹,這人絕對係神棍。

如果只選擇愛聽的話去聽,其實何必去求籤,不求不是更心安理得嗎?
7. 好心着雷劈
2019-02-11 18:17
同意6樓

唔信就唔好問,更加唔應該求簽。

亂吹24才是神棍(唔單止係講解簽佬)
8. 有樓收租
2019-02-11 18:38
有幾層樓收租才是重點。香港地磚頭是王道,有樓收租,正職做唔掂都冇所謂,媽叉老闆都大聲啲。
9. 引刀一快
2019-02-14 01:54
雜音

想要幾層樓就一定要睇價入貨。
頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。