5. 亮剑 2013-11-11 11:54:00
淡淡的谬论：
1）一手劈价，2手要跟？
小业主如果自住，使乜理佢？
又要是有正现金流的话，继续收租有何问题？
点解要跟价沽？
何况发展商系咪真劈？请睇清楚夹下价唔该！
2）加息之后楼价就会跌？
加息？！请问声几时加先？
而且边个可以整个图来俾我睇睇，加息之后嗰一年半载就会令到楼跌？
3）政府打房都系为香港好，保护金融系统安全呀？
人哋有几球首期，只系用入息三分之一去供楼，就唔「俾」人换楼，要罚款！
反而那些要左支右绌班首期，做足九成要借按保，要供足三十年才能紧紧过压测嘅人，你就鼓励人家上车！
一句讲晒，应该买嘅，你政府唔俾人买！
本来要等待一下嘅，你政府就夹人上车！
4）地产代理都系衰神，夹埋政府、地产商同小业主夹高楼价，鱼肉小市民！
地代如果现在仲唱好，夹高楼价，咁叫阿水来接货？
地代嘅角色，系将买卖双方分歧收窄，做成单刃先系路，佢理得你业主几钱入货，要不要入肉？
对佢哋呢啲赚佣金嘅行业来说，成功做成买卖就有钱，否则斗零都冇，将楼价唱高，令到客源更少，对他们有何好处？
唱好冇生意，唱淡有银用。俾著我系地代，我就唱淡啦！
5）政府出招，楼价必跌，不要逆势而行呀！
点解政府要出招？因为佢哋知道，如果唔出招㩒实啲有实力买楼人仕，个市升硬罗！
但有様嘢好奇怪，港人对特区政府嘅信任度好似极低喎，但唔知为何呢下佢哋，又咁信政府打击楼价会做倒嘢呢？！
6）现在楼价贵，等平啲先买！
点解楼价贵？经济好人人有工做！
点解楼价趴街？经济衰好多人失业，焗住或被迫卖楼救急罗！
仲有一样嘢好鬼衰，楼市跌银行紧收遮，咁除非你大把水又系打紧份政府工，否则钱庄借条毛俾你！
7）去新界咪有大把地，点会唔够地起楼？
新界当然有好多地啦！但佢哋都有人霸占咗啫！你政府要发展，问过那些乡亲父老，四叔同诚哥未？
可能改变政府手持嘅郊野公园地，放少少出来，够几拾年用！
但波叔提下咋，已经瓜老衬！
8）现在就话经济好啫，人冇千日好，花冇百日红！
人生有多少个十年？你唔衬弍零叄拾岁去搏，唔通等到几拾勾才去首置？你有冇能力FP呀，否则银行借6竹过你！
9）租唔得咩？
其实咁多次楼灾，灾民最主要嘅死因，并非摸顶入贵货，而系佢哋高估及计算错自己的供款能力，又无预留后备资金，因而惨遭毒手！
极端例子，你97年摸顶入件太古城，每月供款冇脱期，现在供甩啦！
反之你03年CCL3X俾你百零入康怡又点？三个回合脱咗期，现在咪做租客罗！
在香港除非你老豆老毋有，或者你穷到燶要轮公屋，否则点都要想办法上车，买楼有风险，但租楼风险亦唔细，如果真系想过、度过、衡量过你冇呢份胆量，咁真的唔好勉强，无谓害人害己累街坊！
10）供唔掂楼咪大6！
现在租紧楼嘅人兄，要是你收入大减，交唔倒租，请问点收科？你个业主会否通融通融唔使你交租？
咁如果一个小业主，遇到相同情况又会点？
无调查我唔会斋讲，问过下人点柝招啦！
A 首先供款年期唔好借尽，咁就算有乜冬瓜豆腐都有走栈位！
B 首期最少三成半到四成！
C 预留最少一年按揭供欵备用！
D 毎月当自己系供紧五厘息，有剩做人仔储备，要是仲系两厘几息，千万唔好还俾银行，而呢笔供款不要过入息一半！
E 买定保险以防不测！
香港呢次楼市上升浪，系集合以下因素所致，乃完美风暴！
A 经济好、失业率低。
B 环球利息普遍低企。
C 全世界政府都狂印银纸，热钱充斥市场。
D 大陆经济仲有7％以上增长。
E 香港土地供应严重供求失衡，政府想搵多哋地，又受到掣肘。
F 新增以下需求：双非童、大陆留学生、大学外地毕业生可留港就业。
G 政府想去救火，但用错火水！
本来要压抑楼市升势，应该去增加供应，但打房政策的终极效果，系迫持有物业者唔好再做买卖！
对付炒家嘅SSD⋯⋯迫人厚切取代薄咳，叫人囤积居奇就系呢种！
对付表叔嘅BSD⋯⋯迫地产商（与及港人买家）同佢哋埋单找呢条数！
对付收租佬嘅DSD⋯⋯占整体2手市场逺一半嘅细尺数单位，本系上车盘来源，但DSD令换楼链断裂，搅到换楼客企晒喺度，换楼不成唯有寄居喺一间细码楼度，咁就整到大中型单位养老鼠，中小型单位供应更加紧张！
楼飇若是只得一两个因素，咁对症下药自当药到病除，但现在香港所遇到嘅系几种利好因素齐现，加政府政策失误！
如上述各项因素继续，咁下年就会爆单边，这就系我的预测！
App下载
