地產論壇
登入名稱
密碼
頁數:
晨早夜話(44)燒春雞
瀏覽人次:9974    回應:8
晨早夜話(44)燒春雞
 
湯文亮博士
紀惠集團行政總裁
2019年11月30日

  昨晚無應酬,屋企所有人又唔得閒應酬我,又唔想去打羽毛球,於是一個人去IFC睇「决戰中途島」,在途中,收到一個做飲食業朋友短訊,佢叫我支持飲食業,就算一個人都出街食飯,於是立刻訂位,並且訂了一隻法國燒春雞,老友問,是不是要開邊燒,不要切走雞背,我話是的,因為一般外國餐廳做燒春雞,都會將雞背切走,但不切斷,這樣可以放平來燒,其實,雞鴨鵝最好食的地方並不是髀,而是背,我細個時識得一個二世祖,每次出街食飯都叫一隻燒鵝,他只食鵝背,大家唔好以為他敗了副身家,今日仍然不知幾有錢,當時佢老豆話,食得幾多,只要唔賭,點使都使唔晒。

  我在中環睇戲食飯,市面似乎都回復八九成,今次社運雖然元氣大傷,不過,香港的回原能力很強,就好似中途島戰役中的約克郡號航空母艦,不過,如果不斷地被破壞,結局亦好似紐克郡號一樣,一沉不起,寫完文要去游水,因為今日是屋苑內的室外泳池最後的開放日,明日要在室內游水。

晨早夜話(44)燒春雞
1. Stephen Wong
2019-11-30 09:02
發財立品
2. 引刀一快
2019-11-30 10:04
中意食鵝背叫同夥計講就得喇,燒臘佬話最靚果舊係蘿柚對上三隻手指位,我cheap人一名,除咗鵝上翼,舊舊都中意,試過一啖吞一舊差不多拳頭咁大嘅鵝膏,不過之前要用水沖一沖,唔係就鹹到苦。
3. 十一哥
2019-11-30 11:24
香港又嚟…驣籠換鳥、好多霸咗高位阻住哂嘅庸才…為咗安心價值、都開始諗後路、咁對香港有消滯效果、1~可以褪番好多位出嚟比後上、2~順手精簡人手…走10個補7名就夠用…年資新…人工又平D…生意就易守、3~走即係唔睇好…有D要賣樓先夠搣、咁又褪番多D細單位民生樓出嚟、經濟差…多人走…爭食小…又一春、經濟就似四季係咁loop。

食鵝食頸…要切直條、不過十一哥都係鍾意食脾~下半段。

4. 亞Q
2019-11-30 11:37
地踎酒樓嘅燒鵝飯燒鴨飯 , 例牌斬埋晒D連些少肉都無嘅背脊俾我 , 原來係益我 , 我都唔識感恩 !
5. 十郎
2019-11-30 12:05


      琴日長沙灣道出九龍方向 , 有人示威堵路 , 在下適逢其會 ,巴士困晒在美孚站 ,  唔見有新聞講。

      一哥話的鵝膏 , 我理解係鵝肚 , 脂香肥共瘦 , 有咬口 , 那裏是五香粉同鹽的聚腳點 , 所以鹹 , 一樣是我的首選。燒臘說燒鵝最好食係鵝肚及鵝背 , 我一早知。


6. 引刀一快
2019-11-30 13:36
十郎兄

你講嘅鵝肚,早就俾人搶咗,當日我食果舊,係拜山斬鵝時,其他人怕肥,搣埋搣埋一堆嘅鵝肥膏,即係鵝油,襰住少少肉碎,一啖啪落去,油香加細碎肉香襯托,食完幾日內會加速身體燒脂,好嘢嚟㗎。

鵝髀下半段,燒臘佬叫腳棍,筋腱肥美,掛爐特佳,因為最接近爐火,全身油脂就係集中喺兩條腳棍同上翼前端透出嚟,好奇怪,腳棍好食,上翼就又乾又粗唔好食。
7. 十郎
2019-11-30 14:19


     我都最怕上翼 , 後生之時都咬唔開 , e家更加唔駛諗。唔知點解 , 食親燒鵝瀨粉 , 梗係給一隻上翼 , 我眉頭皺。

8. 十一哥
2019-11-30 17:38
食嘅知識真係冇乜…難得刀刀又肯指教、識多個名…脚棍…就係最鍾意條筋腱豐汁。

頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。