鮑威爾是否能夠捱得過今年

　　有老友同我打賭，雖然一般人認為，美國總統什麼人都可以炒，但就唔能夠炒美聯儲局主席。佢有信心，特朗普一定有辦法在今年內炒鮑威爾。今次比佢大到，雖然我很喜歡打賭，但今次真的不敢同佢賭，我話投降輸一半。本來食晚飯，飲紅酒，現在改為食午餐飲啤酒。

　　無論古今中外，做官最緊要有官威，不少人做官並不是為了份糧，而是為了要威。無論有什麼人提問，可以愛理不理地話了解。如果唔知點樣管理，索性話自律便算數。如果做官不是為了一個「威」字，不如唔好做，尤其是在香港。雖然有得威，但很多時候被反對派鬧到狗血淋頭。我有時候都替他們可憐。不過，他們又甘之如飴，仲話食得咸魚抵得渴。

　　我問老友點解會話鮑威爾捱不過今年。佢話橫睇掂睇，鮑威爾都唔似做官，些少威勢都冇。相比上一任白髪魔女耶倫簡直差幾皮，這就是特朗普不敢用耶倫的主要原因。如果耶倫仍然做美聯儲局主席，特朗普一定不敢咁多聲氣。當日特朗普聽從財長梅紐欽的說話，起用鮑威爾做美聯儲局主席，就是貪佢聽聽話話。誰不知鮑威爾做了主席之後，唔知聽邊個講冇人可以炒佢，於是唔聽特朗普支笛，唔理特朗普反對，在去年底堅决加息。本來，加息是經過美聯儲局委員投票，不是由鮑威爾一人話事，但鮑威爾可以作出引導說話。如果他說唔加，有九成機會可以唔加，加息無形中與特朗普過唔去。況且在中美貿易戰關鍵時刻，加息增加了美國人負擔。特朗普是一個記仇的人，鮑威爾能夠捱到今年底已經顯示特朗普寬宏大量。所以，老友夠膽同人打賭，老鮑一定不可以捱過今年。

　　鮑威爾在去年底加息之後，已經不斷補鑊話沒有再加息需要。到最近話今年可以減息，但始終得個「講」字。特朗普當然不開心，傳聞話準備將老鮑降職，意思即是叫佢自動辭職。

　　昨日我去TVB樓市速遞，主播問美國減息，香港可不可以跟隨。老實說，我都想，不過想都想唔到，除非美國減息9次，香港才有機會跟隨。暫時來說，美國減息與否，與香港無關。