今日中原指數會不會破頂

　　上星期五，中原指數連升15星期，只差0.1%破頂。當時不少評論員以及指數公司負責人話下一個星期五一定破頂，叫各位業主準備開香檳慶祝。我聽到那些聲音，於是又發揮第十個人理論，即是包拗頸。我認為今日中原指數不但不會破頂，而且在未來幾個星期會作出調整，係咁意都要應下景。大家都知道五窮六絕，今日是五月份最後一日。如果今日樓市仍然還未作出調整，即是五月份每一個星期都上升，究竟窮什麼？所以，在五月最後一日作出調整是最理想，又可以應景，樓價又上升。至於六絕，我相信最樂觀的人都不會話樓市仍然會繼續上升，或者他們會話樓市在高位橫行，睇唔到有下跌跡象。

　　很多人話我是大淡友，其實我不是，我只不過居安思危，投資比較小心一些。我亦認為在供應不足，需求量強大之下，香港樓價會不斷上升，直到政府提供足夠供應量。在我發表睇好樓市的文章不足24小時，特朗普宣布將中國進口至美國2,000億美元貨物關稅由10%上調至25%，還有3,000多億跟尾。我認為不用再轉軚，因為特朗普反口覆舌，中美貿易戰隨時可以簽訂協議。今次有些不同，在特朗普宣布加徵關稅後，四大鷹王逐個蒲頭，華為更加被制裁，睇情況對中國還會打壓一段長時間。華為只不過是中美貿易戰役中一個戰場，唔知道仲有幾多個戰場。老實說，如果特朗普在中美貿易戰有絕對話事權還好，現在我反而擔心被鷹王們挾天子以令諸侯，這樣就世界大亂。君子不立危牆下，現在投資採保守策略絕不為過，不能夠話我是大淡友。

　　其實比我睇淡樓市的人多得很，在特朗普宣布加徵關稅後，新樓二手樓的成交量大幅減少。有不少打算買樓的人延後行動，但不能說他們是淡友，他們只是小心一些。有一些人身體力行，本來已經買了新樓都要撻訂，到五月中大約有160個單位，等於大約1.7%總銷售量。千祈唔好話這個百分比微不足道，2003年沙士期間的撻訂比率亦只不過1.6%，在樓價指數屢創新高之際，撻訂比率竟然高過沙士期間。由此可見，很多人突然轉了軚，由非常睇好樓市到突然放棄訂金，不過我不敢說他們做錯。如果中美貿易戰持續到年底，今年升幅大多數會化為烏有。如果持續到明年底而特朗普又當選美國總統，我真的不敢想香港樓市會下跌多少。現在中美貿易戰好似一幅危牆，君子不立危牆下是很正常。