茶餐廳亂話（509）愁看殘紅亂舞

　　星期四早上睇巴塞對利物浦，睇到冇晒癮，利物浦竟然輸3比0。什麼全世界最佳防線被美斯，以及蘇亞雷斯玩殘。在返工之前去茶餐廳食個早餐，老闆問幾隊英超紅軍包括利物浦、阿仙奴以及曼聯表現如何。老實說，真的是不敢恭維，我認為以「愁看殘紅亂舞」來形容就最貼切。

　　首先講利物浦，在英超與曼城對賽前，曾經帶離10分。雖然輸波，但仍然有7分優勢，但被曼城追下3分，追下2分。現在反而落後1分，兼輸得失球差，還有兩場賽事，就算可以全勝，都要睇曼城是否會失分，我估計機會甚微。在歐聯方面，作客巴塞輸0比3，就算回到主場都很難反敗為勝，高普今年又空手而回，愁到爆炸。

　　阿仙奴本來入前4的問題不大，但季尾突然跌Watt，拱手將第4名讓給車路士。雖然現在還有一線生機，但始終是被動，連續兩年不入英超前4，阿仙奴領隊艾馬利一定有壓力。不過話分兩頭，以阿仙奴班底，成績比曼聯好，已經算有交代。更何況還有歐霸可以爭，奪得歐霸冠軍一樣可以打歐聯，艾馬利都唔應該太愁。

　　我相信最愁的應該是曼聯領導層，究竟要買那一個領隊才可以令曼聯復甦？其實，摩連奴是一名好教練，但奈何買錯了兩個人，一個是A山，另一個是普巴，就是他們兩人迫走摩連奴。不過迫走又如何？落場踢波的始終是球員，我估計這兩位仁兄明年不會在曼聯陣中，甚至蘇B都會被炒。如果曼聯請唔到哥迪奧拿做教練，不如番兜摩連奴，大肆改革，曼聯才有機會。無論如何，球季即將結束了，3隊紅軍擁躉應該放下愁緒，很快新球季就會開始。