地產論壇
登入名稱
密碼
頁數:
茶餐廳亂話(495)茶餐廳點解要執笠
瀏覽人次:20587    回應:12

茶餐廳亂話(495)茶餐廳點解要執笠

 

湯文亮博士

紀惠集團行政總裁
2019年4月9日

  今日早上去到茶餐廳,老闆話有好消息同我講。幾個月前,社區有一間茶餐廳開張,出品不甚特出,價錢亦比同區其他茶餐廳貴,但生意滔滔,連他的茶餐廳也受影響。好彩老闆只玩票性質,最緊要有一班熟客,平時可以同佢打下牙骹。但那一間茶餐廳最近結業,理由是各物料供應商不再賒數,導致週轉不靈,唯有結業。我有多少不明白,一兩個月數期是很正常,點解各物料供應商會停止賒數。

  老闆知道我唔明,於是再解釋清楚。那一間出品不甚特出,價錢又比同行貴的茶餐廳提供了一項服務,容許客人年底找數,因此吸引不少現金不甚充裕的人幫襯。因為生意不錯,茶餐廳老闆要求物料供應商提供半年數期,本來的兩個月數期並不足夠。幾個物料商開會之後,知道數期愈長,收數愈難,不但不提供半年數期,而且以後交易要現金支付,茶餐廳唯有不再向客戶提供賒數。當沒有此項優惠之後,茶餐廳生意額立即下跌,捱了兩、三個月,始終捱唔住。由此可見,賒數的確可以令生意額大增,沒有賒數,不但打回原形,而且比以前更差。

  有熟客問我樓市點解會出現小陽春。我見對方是愛黨愛國人士,於是立刻想起沒有共產黨就沒有新中國,於是我話沒有高成數按揭就沒有小陽春。那位熟客不同意,並且引述指數公司的負責人話,採用高成數按揭買樓佔很少部分,這是地產商售樓Gimmick。熟客這樣說我明白老C點解要退休,因為佢唔想講反話。既然如此,新樓現在如此熱賣,又很少人採用高成數按揭,地產商的資金可以準時回籠,理論上是不用同銀行借錢。而事實上有很多人採用高成數按揭,而銀行受制於逆週期措施,資金沒有出路,唯有以非常低息借給地產商,可以向買家提供高成數按揭。如果銀行唔借錢俾地產商,就沒有可能提供高成數按揭,沒有高成數按揭就沒有小陽春。金管局可以考慮放寬逆週期措施,尤其是初次置業者,讓購買力釋放到二手樓市場,銀行不但可以多點生意,亦可以多收利息。那位熟客唔同意,他認為香港是一個自由市場,政府應該讓市場自由運作。他的反應令我懷疑他是否是一個愛國愛黨人士。因為,他不以市民的得著為大前提,不過,這些人實在太多,一方面要求政府提高供應量,另一方面就質疑政府開拓土地。除了老年咁長的明日大嶼計劃之外,甚麼開拓土地的方案都反對,甚至連新樓空置稅都話不可行。老闆見我一面弧疑,細細聲同我講,這叫做打著紅旗反紅旗。

茶餐廳亂話(495)茶餐廳點解要執笠
1. 引刀一快
2019-04-09 09:55
唔知有冇茶餐廳以招標方式點餐呢?
2. 自我陶醉
2019-04-09 10:03
引刀兄

點餐要投標太麻煩了,應該在等位時投標,按座位的位置、景觀出價,饑渴者可以出高啲價,唔洗等位,即時入座,冇人出價則按籌號入座,咁就合乎經濟效益了。

3. 引刀一快
2019-04-09 10:16
自我陶醉兄

咁不如齊齊圍標,要佢打七折喇😏。
4. 自我陶醉
2019-04-09 10:23
咁又唔得喎! 投標只係決定你入座先後次序,食嘢唔會平俾你。 即無論你樓價俾幾多,管理費都一樣咁計,唔好諗住會平俾你。哈哈哈!
5. 新人
2019-04-09 10:24
想請教博士食早餐間餐廰地址在那裡,想見識吓.
6. 引刀一快
2019-04-09 10:31
自我陶醉兄

唔係呀,聞說有啲食客有回贈,不過唔係個個都俾之嘛。
7. 自我陶醉
2019-04-09 11:50
引刀兄

你又搞錯喇! 回贈係用嚟鼓勵你咁合作幫手做高個投標價,吸引其他水魚落踏,不過首要條件係你標價要夠高先會俾番小部份你,答謝你做媒成功,其實嗰啲錢本來就係你嘅,同餐價冇直接關係。而額頭貼住水魚兩個字嘅食客,當然唔會有回贈啦! 哈哈哈!

8. A
2019-04-09 13:43
可以考慮二手樓空置稅同時放寬初次置業週期措施,可以幫到初次置業用家,人人有屋住,社會更穩定。
9. 笑咗
2019-04-09 14:52
其實湯博士打比喻地評論地產市場現象寫得幾好,比起評論大國政治角力何止高一班,起碼合乎現實嘛。
10. 真真薯片
2019-04-09 14:59
茶餐係消費,食左就冇,只可以比錢,樓係資產,買完可升可跌

高按由2015年尾賣既世宙開始普及化,之後比較多高按既大盤有Savannah, 啟一,海篇匯,grand yoho

呢批樓近年入伙,但唔見得高按盤造成好大沽壓,主要係樓市升左三成以上,好多人轉得返去銀行

另一個高按浪係2018年賣既大盤,果批單位成交普遍萬8或2萬以上,仲可唔可以再升三成?表面睇好難相信,如果成真既話就非常大鑊
11. 搭嘴
2019-04-09 15:00
博士高見,金管局大力限制銀行借錢俾小市民上車,但又無限制銀行泵水俾地產商,做就高成數按揭呢D畸型野,令 supply 話事權全由地產商掌控,樓市大陽春 easy job!

只要金管局一日唔改變呢種玩法,地產神話就一日比一日令人神往。



12. 冇幾何
2019-04-09 16:39
10樓,多謝提醒,唔怪得有人話年半升3成啦!叫人放心高按去買樓花,入伙時就實上到會,真係用心…………
頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。