地產論壇
登入名稱
密碼
頁數:
要坐監,乜玩到咁大
瀏覽人次:28821    回應:25

要坐監,乜玩到咁大

 

湯文亮博士

紀惠集團行政總裁
2019年3月28日

  較早前華懋吳崇武希望政府在執行新樓空置稅時手下留情,當時大家都唔明白武哥的意思,前日,政府宣布如果地產商故意避繳新樓空置稅,最高刑罰可以監禁一年,嚇到所有地產商暈晒,本來地產商有晒大計避繳新樓空置稅,大家知道的一招叫左手交右手,但講到要坐監,相信唔會有地產商夠膽以身試法,如果唔想交新樓空置稅,唯有在這幾個月加速推售已入伙的貨尾單位,或者會提供十成按揭,就算買家供唔掂,地產商可以收回已出售的單位,新樓亦會變成二手樓,以後無論囤幾耐政府都唔會阻止,更加不用擔心要坐監,今次新樓空置稅刑事法可能幫了那些沒有錢付首期的人,只要他們夠錢俾印花稅就可以。

  政府將新樓空置稅刑事法亦是為勢所迫,近日樓市回升,有不少唱好樓市評論員話,新樓空置稅只不過是政府與地產商的招式,作用是混淆市民視聽,樓市會繼續上升,甚至有評論話特首林鄭月娥與地產商根本有默契,令到地產商有藉口減慢起樓速度,在這情況下,罰款區區10萬元根本起不到任何作用,所以,政府要用到坐監這一招,相信都是被那些唱好樓市的評論員迫出來,政府唔認真,大家都唔知道有咁多空置單位,地產商要避免繳付新樓空置稅,唯一辦法就是減價促銷。

  地產商又不用擔心,他們近日做咁多高成數按揭,一定持有放債人牌照,而法例規定,持牌人一定要隨時可以找得到,就算搬屋,都要上報有關部門,如果沒有上報,法例規定可以將他們判監6個月以及罰款10萬元,但我從來沒有見過持牌人因為搬屋沒有上報而坐監,今次新樓空置稅刑事法最關鍵就是是否故意漏報,老實說,就算故意都不會承認,所以,結果最多是判罰款了事,判監方面,我相信政府是會手下留情。

要坐監,乜玩到咁大
1. 十一哥
2019-03-28 09:52
權力令人腐化…粗暴施政就係極端腐化、囤積係生意本質、資本主意由買賣盈利滋養壯大、囤積體現在各方各面…科技…智識產權專利等等都係囤積居奇、樓貴、要拉就拉…源頭供應者…正苦、為政無能…就係賊、所謂庸官賊國也 !

2. 引刀一快
2019-03-28 10:09
判監唔夠嘅,飛地喇,一飛地,地產商爭住起樓,鬥快起樓,早早賣咗袋袋平安,有錢就攞去飛地霸位,唔會慢慢磨。
3. 腥港人
2019-03-28 11:31
中央呢幾年喺香港掃咁多貨,揸重貨點會拆自己臺吖。飛地個目標根本唔係推冧樓價,一方面係加快融合,另一方面係面係要收錢,你諗下香港買幾多天價泥沙去填海?
4. 真真薯片
2019-03-28 11:33
如果捉到唔交空置稅只罰十萬,咁就可以當成生意成本咁計,十萬對賣樓黎講根本唔係錢
5. 十萬對賣樓黎講根本唔係錢
2019-03-28 11:50
欺騙公帑, 每 count 坐一年, 十 count 坐十年, 分期執行。
6. 真真薯片
2019-03-28 12:58
短線睇,貨己單位不足兩萬,當佢兩萬伙計,都係1.3年供應量左右,如果今年淨係賣貨尾,一年新樓銷量大約萬五,當一萬消費力用黎清貨尾,五千購買力消耗新貨,一萬比較遠期既樓花向後推,呢個動作重複兩年,兩萬貨尾就賣得7788,拖慢起樓全部賣地後六年先入伙(其實近幾年好多盤已經係咁),兩三年後個市冇貨尾,仲大鑊
7. 十一哥
2019-03-28 13:21
衹租不賣、租唔出又點、老表創意…員工宿舍、冇理由租金指導…要求100%出租率啩 !  越攪越多私法覆核、最着數狀棍 !

8. 員工宿舍
2019-03-28 13:40
咁之後嘅買家就唔係買緊一手樓咯喎, 係買緊老表宿舍, 要搵老表黎買?
9. 湯瑪斯
2019-03-28 14:45

同意博士話「政府要用到坐監這一招,相信都是被那些唱好樓市的評論員迫出來」。就好似有人話發展商會以減慢建樓速度回應空置稅,同樣會逼政府出招對付發展商。所謂「富不與官爭」,無謂同政府作對。

我堅信政府是最有能力壓低樓價的因素。只不過要睇政府官員的決心和柏力。大家唔好睇少政府既力量。講真,政府只要推行租管和物業增值稅,樓價既大跌。不過政府逼不得意唔會出呢兩招,因為這會令樓價硬著陸,經濟受損!七傷拳不能輕易用。除非換左特朗普做特首!

11. 大陽春
2019-03-28 17:03
刑事化增加機會成本,發展商更加會拖延攞入伙紙時間,更加小心投地,增加流標,更加拖慢農地一補地價步伐。

最終結果,就是更加少供應。

政府還沒吸取多年辣招反效果的教訓。大麻價錢貴主要是賣大麻刑事化。
12. 引刀一快
2019-03-29 11:54
再少D供應,咪加速香港潰敗囉。
政府加辣我加租,政府減空置就唔起樓——講到啲中產同基層予攜予取,香港競爭力一路走低仲點挺住啲樓價?靠換血?
13. 大陽春
2019-03-29 16:16
升勢加劇。個個专家都話今年不可能有小陽春。今年班專家终于威番一次。

系都要把小陽春迫到大陽春。
14. 十一哥
2019-03-29 16:19
香港格局…三元不敗、盲毛最鐘意教路、敗軍之卒…縮埋灣中…裝裝下、識睇就唔洗龜縮啦、酸到9噏香港會潰敗…
15. 自我陶醉
2019-03-30 12:15
引刀兄

連減免差餉只提供予自住樓都無能力推動,對這政府的樓市政策,你還可以有什麼期望? 所以,我一早叫浪子唔好寄望林鄭會做到啲咩嘢。

很明顯,政府考慮重點唔係民生,亦唔係競爭力,而係政治穩定。 阿爺第一目標是在50年內不斷溝淡香港,直至完全掌控整個政治生態,樓價上升,反而令部份港人流出,阿爺提早達標。

人口被人為發水,形成所有生活相關配套都僧多粥少,加上全球貨幣發水催化,樓價自然上升,形成泡沫,除了住屋外,醫療,交通、地鐵服務等亦相繼出現敗象,可這只是個開始。 

樓,雖然唔值得投資,地霸股勝算就高得多,勝在有折讓,泡沫化情況亦相對較輕。

要在港繼續生活的人,想的不應是樓價,反而是自己能否接受住在這個將會越來越擠迫的城市。相比之下,國家的加速發展,令週邊增加更多機遇,溶入大灣區的確是個不錯的選擇。

16. 鳥5
2019-03-30 13:31
博士,有種情况係連大老闆都計5到,冇鬼點死人呢?自己友報串,人贓並獲嗎。。。自己公司内鬧呢?刑事,5係文事。。。文事要跟刑事,會計 概念點做呢... 點樣將部分 工序外判踢出街呢.... 成本唔同呀.. 律師呀梗係話冇事㗎, 咁樣咁樣點樣點樣咪得囉, 最後嗰條Law 咪冇事咪冇事Law.. 在下維持原判 下半年 政府袋型戰術 收網 矛頭得一個 地霸。。。
17. 引刀一快
2019-03-30 22:10
自我陶醉兄

融入大灣區唔係香港人嘅選擇,根本就冇得選擇,可以預見嘅係一大波觀念轉向潮,一大堆人開始探索呢個新領域,發現一直因為偏見而忽略嘅可能性,呢個轉向潮會嚟得好急。
大陸溝淡香港人嘅方式,只會換來一個一路貶值嘅香港,樓價越升,香港越跌watt,所以我完全同意買股好過買樓嘅講法。
18. 引刀一快
2019-03-30 22:22
真係好笑,有d人俾人扣住回鄉證,只能企喺沙頭角遙望深圳,返一次大陸艱難過南北韓團聚探親,成日話大灣區係山旮旯,睇見大陸咁大條水冇得食,怪之咁唔抵得港燦喇。
20. 思維混亂
2019-03-31 06:32
淡淡們的思維方法好混亂,話樓價越升,香港越跌watt, 而跌watt的結果是令香港樓價越升。

香港旣然趺咁多Watt, 咁請問大灣土豪及精英為什麼不惜付3成辣招稅搶港樓?

一個跌了Watt 的城市樓價可以貴絕全球?
頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。