地產論壇
登入名稱
密碼
頁數:
別人勤力我懶惰
瀏覽人次:23923    回應:11

別人勤力我懶惰

 

湯文亮博士

紀惠集團行政總裁
2019年2月19日

  有老友最近知道我們買了三層寫字樓,動用了十幾億現金。事前又唔見我提及,甚至連樓都唔去睇,話我不但魯莽,而且太懶,遲早會出事。現在就算做得不錯亦只不過是有些運氣,他實在替我擔心。其實,老友擔心都是多餘,連我的事也要擔心,自己的事反而做得不好,不如先做好自己的事,我的事留番俾我自己擔心。

  老友話我太懶惰,連樓都唔去睇就出咁重手買。如果俾著第二個人,不但會左計右算,仲會問一些專家的意見,出一份可行性報告。在這個時勢,出價應該保守一些,其實老友只知其一而不知其二,見到我出手快就話我懶,但他又唔見到我勤力的時候。我所買的甲廈,以前已經睇過唔知幾多次,心中早有一個價錢。如果未到心目中理想價情願唔買,亦有老友知道我不時睇樓話我浪費時間,唔打算買就唔好睇。老友唔知道我的策略是別人懶惰我勤力:當大家唔去睇樓,那些物業代理招呼都會好一些。現在樓價下跌,大家急急忙忙去睇樓,計算出價,非常勤力,我反而懶惰,連樓都唔睇就出價。大家都覺得很奇怪,其實,我是向巴菲特學習。

  巴菲特的金科玉律,別人貪婪我恐懼,別人恐懼我貪婪。巴菲特並不是與民為敵,而是他做足功課。他知道大部分人貪婪時就會忽略了那些不利因素,所以他反而恐懼,將手上的股票出售;但當其他人恐懼時,就會漠視那些有利因素,他就會變得貪婪,大量買入股票。我沒有巴菲特那麼醒目,又控制不到情緒,做不到別人貪婪我恐懼。我只能做到別人勤力我懶惰,別人懶惰我勤力。

別人勤力我懶惰
2. 十一哥
2019-02-19 09:32
大刁係藝術…憑感覺、小買賣先至要精算。

3. 自我陶醉
2019-02-19 10:11
同一筆資金,同一時間段,投資一隻唔同嘅股票,回報可以有天淵之別,股神投資前,必定認真睇清楚公司招股書或過往財務報表,才會做投資決定,而之後亦會每年評估公司表現。 成功非僥倖,勤儉與才能,絕對唔係靠估。

4. AU
2019-02-19 12:09

博士其實是分享做人和投資的經驗和道理,順便曬吓命。

6. Peter Peter
2019-02-19 13:29
湯博士對於物業投資確係到了「爐火純青」的地步,佩服佩服
7. 湯瑪斯
2019-02-19 13:55

在自己地盤曬吓命好閑啫,而且都真係有條好命先至有得曬

博士的確令人配服!正如我都好想叫大家小心啲唔好信大好友話樓價止跌回升就不自量力入市。我是一個普通嘅中產,在事業上成就大大比不上博士。博士事業成功,家財萬貫,加上是業界中人,說話就有影響力。冇得唔順超既!

9. 兩餐一宿
2019-02-19 15:45
的確很精彩,受教了!
10. 引刀一快
2019-02-20 04:25
上年經紀開價10億一層,依家到手十幾億三層,呢D就係水平。
11. 自我陶醉
2019-02-20 08:17
所以話呢,有錢買唔算叻,有錢又有腦,識得揀合適時機出擊,同有錢但冇腦,咩價都搶,慌死執輸嘅人,水平高下立見。

12. 引刀一快
2019-02-20 12:44
自我陶醉兄

“咩價都搶”係一種信仰,由一啲大師級投資者所灌輸,能夠領悟並實踐嘅人,最終都可以返家鄉。
13. 自我陶醉
2019-02-20 13:13
引刀兄,

搶都未夠奇,奇就奇在大師話 “所有的成功者,都是長線投資者”, 但佢唔記得自己呢頭買完轉頭就劏,賣都賣唔切,唔通佢想示範什麼是失敗!?

14. 引刀一快
2019-02-21 07:14
自我陶醉兄

你睇得好清楚,係寫住“所有的成功者,都是長線投資者”,不過香港人唔係個個心水清。
好多人,理解成:所有的長線投資者,都是成功者。


頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。