地產論壇
登入名稱
密碼
頁數:
2019年股市樓市預測
瀏覽人次:27961    回應:14

2019年股市樓市預測

 

湯文亮博士

紀惠集團行政總裁
2019年1月14日

  在今年初,我有一個大型晚宴講座,主辦機構希望我能夠預測2019年股市樓市走勢。老實說,樓市是我老本行,預測樓市非常容易,只要用一個「跌」字就可以。當然,怎樣跌,跌幾多就要詳細解釋一下。至於股市,雖然不是我的專長,不過,我仍然有自己見解。

  在去年最後一季,我做過不少講座,真的是唔知點解,很多同是講者的財經專家。他們都不約而同睇淡股市,理由亦不外乎是美國加息,中美貿易戰等。本來在情況不明朗下,叫人小心投資亦是合情合理,但是他們認為,既然肯定股市下跌,點解唔做淡沽空?甚至有經濟學家話唔沽空就對唔住老祖宗。當晚的演講,我反其道而行,認為今年股市大約會有15%升幅。我知道不少專家並不同意,而我的理由是大家擔心加息與中美貿易戰的確會令股市下跌,但這兩個不利因素早已反映在香港股市內,就算繼續加息以及中美貿易戰惡化,股市亦不會有太大反應。不過,如果中美貿易戰有轉機,鮑威爾又不敢加息,股市應該會掉頭回升。所以,我大膽預測股市會上升15%。我的意思不是恒指在年底上升15%,而是恒指曾經上升15%,這是有分別的。

  至於樓市,今年將會是新樓主導。地產商在前無去路,即是購買力不足,市民不願意以高價買新樓;後有追兵,即是新樓空置稅的情況下,新盤開價必然非常克制。凱匯天鑽等就是極佳例子:估計新樓低價開盤將會成為新常態,而低價自不然會搶走大部分二手樓的購買力,樓價自然會向下調整,所以我預測今年樓價將會下跌15%,並且認為這是一個保守預測。雖然有評論員不認同我的睇法,他認為新居屋27萬個申請帶動了龐大購買力,樓價在去年已經過了谷底,今年早已回升。我對這個睇法有所保留,如果他的理論正確,地產商就不用減價賣樓。說到底樓市經歷了一個長達15年升浪,出現合理調整亦是可以理解。如果現在仍然不顧一切以高價買樓,未來是有機會受到重創,甚至變成負資產者。

2019年股市樓市預測
1. Peter Peter
2019-01-14 09:56
湯博士見解👍
2. 股升樓跌?
2019-01-14 09:57
我好似未見過呢種情況
3. 真真薯片
2019-01-14 10:48
博士話股市彈一彈15%,唔係轉勢,死貓彈的確唔奇,股市成日都短炒上落幾個月,但係股市彈得勁,樓市都會轉好,然後股市唔惦,又拉底返樓市,上年中我講股市跌左五千點,唔好同我講冇影響,結果比人鬧到反艇,依家冇人出聲,樓市股市大方向走勢基本上係分唔開,係常識
4. 自我陶醉
2019-01-14 10:53
重溫歷史:

1998年中恒指6500點升到2000年的近18400點,當時CCL一直在低位反覆下跌。
5. 真真薯片
2019-01-14 11:38
自醉兄,

果段科網熱算係二戰後到今日既唯一例外,當年市道奇差,股市獨自起泡,但拉唔起香港實體經濟,直到03中央放自由行

香港股民參與度每況越下,越黎越少人玩,上年33000點都冇出現全民皆股情況,今日想要股市獨自起泡,難矣,當然,我知自醉兄身手不凡,股市可以買升買跌買唔郁都得,對高手黎講,當然玩股好過玩樓
6. To 5
2019-01-14 12:09

片哥, 實體經濟要靠交易而生出盈利, 民間的交易為企業提供實現利潤的基礎, 而國與國的交易則為民間提供可供購買的商品。
唔計貿易戰, 你覺唔覺得已經冇咩野好買?
傳統教導我們去人地屋企要帶份野, 新年都是痰罐曲奇多餘麵之類, 昨天曲奇做緊 103 (八至十年前 103 都唔得)還可以 92 折可以送上門, 其實超市買滿五舊八九折都做左二三年。
就算唔係大眾化野, 都食唔到咁多喎, 近半年行過奢侈曲奇店, 都係拍烏蠅店員望街嘅, 有機走地雞蛋, 十蚊一隻, 唔放啲響度唔夠高檔, 放響度放到過期又賣唔晒。
黎緊拜年都係封封利是算嘞, 封五舊好未, 然後兜個圈大家一齊存番入銀行。
7. 真真薯片
2019-01-14 13:13
6樓,的確依家已經冇乜野可以買,股市難玩(高手另計),地點好,樓齡新,屋苑有規模既優質港樓,用黎長線保值應該可以,但係視乎你用咩財務安排去買,中途都有被震走既風險,再加上首置名額限制,買港樓都係有限度,依家最多一開二,冇得二開四啦
8. 自我陶醉
2019-01-14 13:14
薯片兄

其實我都同意股市現時只能視為反彈,大趨勢依然未變,我只係想提大家股升樓跌唔係冇可能,千祈唔好見股升就諗住樓市升梗,不顧一切撲去炒樓。

股市嚟緊嘅炒作主題主要有三個:
1. 5G概念
2. 美息見頂 + 人仔回穩
3. 貿易戰氣氛緩和

若然三個同時出現,係有條件製造一轉急升嘅,升完先再跌過,而且可能跌得更急。

而樓市最大問題係成交少,流動性低,入市容易出市難,要大升仲要在高位維持到18個月以上實在唔容易。

9. 真真薯片
2019-01-14 13:24
自醉兄,多謝分享意見

我就認為投資股市好易被人為短期5000點左右既波幅震死,除非閣下身手非凡,正常人好易輸,當然,股市好處係可以分段斬,唔會輸晒,樓市價碼大,一輸就入肉

樓市其本上入市果刻已經定勝負,價錢平,質素高,已經贏大半,剩底問題係唔好被震走,咁就睇你本身既收入幾有實力

港股仲有個隱憂就係A股化,A股表現如何唔洗多講,大部份同胞已經放棄,而香港股民亦有類似現象,越黎越多人放棄唔玩,香港金融中心地位大半係由散戶既血肉堆砌而成,如今散戶越黎越少,升上33000都冇人玩,情況不容樂觀
10. To 7
2019-01-14 13:24
deep discount 的單橦如何?
11. To 9
2019-01-14 13:37
冇得唔玩, 老散唔玩由強姦金強姦後焗玩, 即如社保同三金五險足員足額揸正黎做, 股民唔玩由社保玩。
12. 真真薯片
2019-01-14 18:10
11樓,有強姦金市況尚且如此,可見今日港人對股市投入度今非惜比
13. 自相矛盾
2019-01-14 18:49
同意2樓
14. 湯瑪斯
2019-01-15 16:19

回2樓:

博士錯唔哂!今年前半月股價升左千幾點,但樓價指數仍然在跌。所以短期樓股價格走勢既比較可以出現股升樓跌。至於長期波幅的比較,過往確係試過幾次股價暴跌,幾個月後樓價也暴跌。但係博士講緊既係15%至30%的上落,唔係暴跌。在這個波幅之內出現股樓價格相反走向也是有的。1973年股災,當年樓價十分平穩,並無大幅下調。所以股樓無絕對。我諗博士應該會同意我既解釋!

頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。